【社區人．訪】香港電影海報狂熱者 去到盡收藏超過四千張
動漫節又到，有人為搶購Iron手辦公仔而通宵排隊，也有人迷上做cosplayer而年年新裝。不過，這些都不是林家樂杯茶。年過四十的他也熱愛儲物，不過男人一般愛儲的手辦模型等他都不愛，卻偏愛一張張舊電影海報。《A計劃》、《英雄本色》、《秋天的童話》、《公僕》、《殺手蝴蝶夢》等電影海報都是他的囊中物，多年來共收藏了超過4,000 張。
為儲這些非賣品，他小時候日蒲夜蒲屋企附近的慈雲山戲院，吼準職員將海報「換畫」時摷垃圾桶，長大後在互聯網搜尋「奇珍異寶」，多年來所費不菲。「呢啲唔可以用錢來衡量。」林家樂說。
攝影：張浩維
現時在屯門開設電腦維修店的林家樂，自出娘胎便與祖父母居於慈雲山，小時最常流連的，是黃大仙區老一輩無人不識的「萬年戲院」。「細個跟屋企人落嚟睇戲，睇到一個個櫥窗入面嘅海報，每張都好多嘢睇，當時戲院畀我最大感覺，係可以睇電影海報！」
採訪當日，他帶記者重遊舊地，回到現址已成為老人院的萬年戲院，「記得以前戲院入口正門喺呢度，售票處喺左邊，隔離就係海報櫥窗......通常嚟到最希望啲工作人員要『換畫』，佢哋抆咗落嚟嘅舊海報會掉去出面垃圾籮，咁我哋就睇下有冇機會執到。」他說為了睇電影，小時候更曾試過偷偷竄入戲院「睇霸王戲」。
狂煲香港電影
他對香港電影海報狂熱，也熱愛香港電影：「以前鍾意睇梗係睇成龍動作片，喜劇就可能係《 五福星》之類......鍾意吳耀漢啦，我覺得吳耀漢好好笑，仲有馮淬帆！」家樂指，過去租借錄影帶盛行，他經常在鄰近的租帶店流連，「我用阿爸張租帶卡自己去租錄影帶，可以喺屋企一直不斷睇不斷睇，都係啲落咗畫一排或者好舊嘅戲，最高紀錄係除咗食飯同去廁所，可以坐喺度唔郁，連續睇7至9餅錄影帶。」
有感覺就想擁有它
在家樂數千張收藏品之中，當中有《A計劃》、《英雄本色》、《秋天的童話》、《公僕》、《殺手蝴蝶夢》等風靡一時的電影海報，也有較少人認識的冷門電影，例如由黎明主演的《僅存者》，柏安妮主演的《天靈靈地靈靈》等。
林家樂表示，70至90年代的電影海報大致可分兩類，一種是手繪海報，另一種則是寫實攝影、拼貼，對他而言，海報的吸引力無關電影種類，只要對那齣電影「有感覺」就會想擁有它，折衷方案就是儲海報，最初接觸的都是手繪海報，「覺得（手繪海報）好得意，睇落去好卡通化但又好似幅畫......另一種就係我所講嘅拼貼，我多數都係揀演員，見到海報上有鍾意嘅演員就會想儲，畢竟都係自己成長階段嘅娛樂！」
心頭愛不能用錢衡量
隨着互聯網興起，家樂可以從世界各地收集海報，收藏品數目亦因此大有增長，「 其實反而喺外國搵到更多舊海報。海報其實就好似宣傳一套電影嘅包裝紙或花紙咁，當套戲落畫就好似再冇咩作用，喺香港好多時都畀人掉咗......反而喺外國，可能當年有賣埠嘅，就仲可以搵到。」
多年來在網上售賣舊海報，連郵費所費不菲，他卻不願透露金額：「呢啲唔可以用錢衡量。」他用一個個膠箱載著數千張海報，全數擺放在家中，老婆早對此見慣不怪。「佢只係問我點解唔儲外國電影嘅海報。」
除了舊海報，他也有收藏近年出版的新海報，不過坦言難度很高，「因為依家香港嘅戲院都萎縮得好緊要，印刷量同實體海報嘅數量都減少咗，加上好多戲院都轉晒電子版，依家要儲真係難啲。」為了宣傳電影海報的藝術，近年他為家中藏品一一紀錄，並放上Facebook公諸同好，希望能藉此引起更多人討論和興趣。
