【鋼筋插臂】缺麻醉師手術長等 傷者控訴:成條鋼筋都安排唔到?

撰文:呂凝敏 梁銘康 蔡靜心
出版:更新:

一名40歲姓鄧的地盤工人,昨日(3日)早上10時許,在荔枝角深旺道33號一個地盤內工作時,意外被一支鋼筋插進左手前臂,送往瑪嘉烈醫院等待治理。可是,由11時50分送進急症室一刻起,忍受著劇痛的鄧先生,輪候多個小時仍未能做手術,將體內鋼筋取出,終決定轉往私家醫院繼續接受治療。鄧先生在病榻中表示,在瑪嘉烈醫院等候6小時,只有護士向他查問意外原因,院方以麻醉師不足為由,一直沒有協助他處理傷口,「佢地話冇麻醉師,我呢個情況唔係拆粒釘咁簡單,成條鋼筋喎,你都安排唔到?」直至晚上約7時,轉到私家醫院後,才獲安排全身麻醉做手術,鋼筋足足插在手臂內近10小時。

40歲地盤工人鄧先生經歷10小時的痛楚,手術後身體仍十分虛弱。 (梁銘康攝)
昨日(3日)鄧先生在深旺道一地盤內發生工業意外。 (賴俊傑攝)

「不停問點樣整親,但冇人處理到個傷口」

鄧先生經歷近一天的劇痛後,已完成手術的他仍在病榻中休息,鐵漢談起昨日的意外及苦等手術的經歷時,氣若游絲,「當時喺個一至兩米嘅高台度做嘢,跌咗落嚟,(鋼筋)插咗落隻手度」,他強調自己有戴上安全帶,惟入院時被急救人員剪走。意外發生在早上10時許,至近12時,鄧先生被送進瑪嘉烈醫院,情況嚴重。對於急症室苦等至傍晚6時,仍未獲安排進行手術,將臂內鋼筋取出,他大表不滿,「梗係痛啦!當時入咗院,喺急症室等,唔知點解我唔做手術,唔上病房」,醫護人員替其注射止痛針,惟痛極的他直呼「無用」,「啲護士不停行埋嚟問點樣整親,但冇人處理到個傷口,問來問去都解決唔到問題」。

左手遭鋼筋插進近10小時的鄧先生,術後仍然非常紅腫。 (梁銘康攝)

稱不滿瑪嘉烈醫院安排

心急如焚的他,在傍晚時分終獲二判安排,於晚上7時轉到私家醫院治理,「入到醫院就好快做手術,因為公司喺我過嚟前已幫手安排好醫生護士,嚟到做個例行檢查,就做得手術」,捱痛多時,鄧先生終於在術後取出鋼筋。鄧先生直指不滿瑪嘉烈醫院的安排,「如果我因為呢支嘢(鋼筋)令到我隻手有問題,係咪完全醫院責任?又唔可以咁講,人哋(醫護)事實係有嘢做,但佢哋話冇麻醉師,我呢個情況唔係拆粒釘咁簡單,成條鋼筋喎,你都安排唔到?究竟係咩問題呢?」他認為若院方在資源匱乏下無法替病人做手術,接收病人時應作出分流,「睇吓附近有冇其他醫院做得到,應該講出嚟係咩情況,但問嚟問去都答唔到,淨係話等,咁即係等到幾時呢?」驚險過後,鄧先生猶有餘悸,「我真係好痛,痛到好攞命,成隻手都唔知咩感覺,由10點幾插到晏晝,差唔多成日先做到個手術」。

剛完成手術的鄧先生左手仍然紅腫,他表示由於昨晚接受了全身麻醉,精神仍未恢復,醫生亦未向他談論傷勢,需再加以觀察。入行當紮鐵工多年的他直言,在地盤工作十分危險,難免發生意外,目前未知需停工多久,育有一名10多歲的孩子的他,擔心影響生計,「其他嘢公司會安排,暫時唔急住傾復工」。

鄧先生入行紮鐵工多年,擔心因過久未取出鋼筋而影響手部活動能力。 (賴俊傑攝)

陳八根:無論公私院診治 僱主有責任支付醫療費

職工盟建築地盤職工總會理事長陳八根表示,無論傷者往公院或私院接受診治,相信都不會影響工傷的判決。而作為僱主,有責任支付工傷個案的醫療費用,因此無論公私院醫療費的差異及保險公司的賠償金額,「理論上僱主都應該要賠足。」他補充,現時總承建商(俗稱大判)一般會為分判公司代買所有員工的保險,因此二判可就事件向保險公司再索償。