操流利英文、離地三萬呎高空工作、在各個時區來回穿梭，順便在各國旅遊名勝留下身影。空中服務員一向是不少人的理想工作。任職航空公司三年多的阿良，卻說有苦自己知。飛過歐美亞洲各國，早已對各類客人見怪不怪。阿良心裡最麻煩的客，卻還是香港人。

最多港人投訴「冇飯食」

在本港航空公司任職逾3年的阿良（化名）資歷不算深，但所服務的航班遍及歐美亞洲各國，早對各類怪客、麻煩客見怪不怪。他說雖然印度、星加坡、與馬來西亞乘客投訴多多，但最麻煩的仍是香港人。而最多港客投訴的，竟然是無飯可食。

阿良說，香港的飛機餐一般會有意粉或飯供乘客選擇，而本地客一般喜歡選飯餐，所以往往派餐到後方座位時，已沒有飯餐選擇。「飯唔夠咁就死喇，飯一唔夠呢，我哋真係汗都滴埋呀，要走去 『唔好意思呀』，逐個逐個say sorry。」

阿良說，曾有港客得知飯餐已派完即大發雷霆：「我一定要食飯，我冇飯唔得，點解冇飯呀。」令阿良以後對飯畏懼三分之餘，亦學會應付：「通常咖哩飯好多人要，咁我會講『辣㗎喎』咁咖哩真係有啲辣，有啲人怕辣就唔會叫。揀其他choice（選擇）囉。」「又或者會派多一塊餅乾。」

怕乘客紛紛索取　刻意沖淡杯麵香氣

除了要吃飯，杯麵亦是飛機乘客愛點的餐品。早前有電視節目指空姐為免杯麵香氣勾起其他乘客的食慾而紛紛索要，會刻意沖淡杯麵香氣再奉上。

阿良聽聞後即表示確有其事，原來有空服會以熱水與冷水交替「淥」麵，以沖淡杯麵香氣。阿良建議，與家人朋友同乘時，可先商量需要的杯麵數量，再一次過向空服索取。

「港女」最難頂　內地客最易氹訪問中，阿良口中講得最多的詞語除了「香港人」，就是「麻煩」。可能因為語言相通，有部份香港人對空服要求多多，態度亦不好。「香港客一係好好，一係好差。例如抬起隻腳啦、貪心啦、攞勁多嘢啦、勁多嘢飲啦，叫咗就即刻要有，好似欠咗佢嘢咁。」反而內地客聽過解釋後多願意等候，即使碰上諸多要求的，只要空服態度稍為強硬，亦願意靜下來。

任職空少三年多，阿良清理過洗手間鋅盤的嘔吐物，甚至牆上的糞便漬。但多噁心的事亦比不上要忍受無理的乘客。他轉述同事遭遇，指曾有一班韓國飛往香港的客機，三名「MK港女」乘客點了啤酒和花生後，竟逕自大聲猜起枚來。聲浪惹起乘客不滿，空服遂上前請該三名女乘客降低聲浪，不料卻遭對方爆粗辱罵，又指空服只是「侍應」是抵死及不應多嘴，更表示要投訴空服。

升一級要十年　「頂得順，就繼續做，頂唔順，就走。​」「我好憎啲人講『做得呢份工你預咗㗎啦』.......我都係打份工啫。升一級要十年，再轉要十五年。咁就廿五年青春。升咗職先唔使喺economy serve喎，嗰條腰要做十年喎，好慘㗎。」阿良說，空服長時間彎腰服務客人、搬運餐車、適應時差，令身體積累不少病痛「頂得順，就繼續做。」，雖升職後不用在經濟艙服務客人，但不少空服捱不到十年升職，便先因健康及薪金原因離開，對這行士氣打撃十分大。

問阿良是否亦有離職打算，阿良表示暫無計劃離職，最能留住他的，是生活與工作界線清楚，能騰出時間做自己喜歡的事「收工真係收工」。再者自己亦的確很喜歡這份工「因為可以周圍識人，離開香港。」「我發覺自己唔係一個可以喺香港Stay（停留）好耐嘅人。而且香港近幾年怨氣真係好重」香港同事從討論生兒育女，變為應不應該生兒育女，壓抑的社會氣氛令阿良萌生借工作避世的念頭「一年都冇一半時間喺香港，做人會開心啲囉。」工作過後，褪下制服的阿良仍然留在香港，但香港似乎再也留不住他。

搭飛機小貼士：

若想飛機餐「有得揀」，可選擇第40排附近的座位。因為空服會從第40排開始派餐，餐盒最為充足。杯麵只會在長途機（航程10小時以上）提供，數量若為乘客數量的一半。如有任何要求，建議在空服派餐後提出。因為空服派餐前十分忙碌，若要另外應付乘客，會令飛機餐押後奉上。想知道飛機餐產地，可留意甜品或小食的包裝。有傳聞指飛機水槽衛生欠理想，阿良指空中服務員「一般唔會飲機上出嘅熱水、茶、咖啡，只會飲樽裝水或紙包飲品。」搬運行李不屬於空中服務員的服務範圍，乘客應盡量自行將行李搬上儲物櫃。