【動漫節‧有片】VR簡淑兒陪遊日本 扮完女僕再扮人妻
有冇諗過簡淑兒（Jessica）係你女朋友？機會嚟喇飛雲！簡淑兒、張沛樂、陳偉琪同模特兒Sadelle就趁動漫節推出咗隻VR app，佢哋喺入面會化身成不同身份同玩家互動，簡淑兒會扮女僕同空姐，而且對話極具誘惑性，吸引度分分鐘勁過Big Big Channel，Jessica仲話：「好尷尬又緊張刺激囉！」
Jessica早前去到日本拍攝這個「VR旅友」遊戲，玩家可以第一身同Jessica互動，Jessica扮演玩家舊相好，兩人在日本偶遇後發展的故事，在女僕餐廳打工的Jessica會穿上女僕裝服侍玩家，向玩家講：「我係來自蘋果王國嘅蘋果公主，最鍾意紅卜卜嘅蘋果。」又在蛋包飯上畫公仔送畀玩家，又做心心手勢，食飽之後Jessica會話：「我就嚟放工喇，你喺出面等一等我吖！」嘩呢句應該好多人想聽到。
更多精彩畫面：
Jessica仲會陪玩家睇櫻花，又會上玩家屋企玩煮飯仔十足女友一樣。她在不同場景會穿着兔女郎衫、空姐制服、和服等等，不過性感程度絕對低於另外3個女仔。Jessica對於要對住鏡頭扮女朋友就大叫尷尬：「好似喺女僕餐廳嗰度，我要對住鏡頭用日文唸咒語，要當對方係男朋友，係好奇怪！係好尷尬又緊張刺激囉！但拍得好開心嘅！」
張沛樂（沙律）喺遊戲中則會扮一隻變成人嘅流浪狗，被玩家收養後聽教聽話，陪主人游水、沖涼，沙律唔單止要性感，仲要嬌聲嬌氣咁講嘢，一反沙律的性格，她說：「有啲對白都幾意淫，正常嚟講係好難講出口，但我係扮狗嘅我盡量做啦！其實幾好玩，反而嗲聲嗲氣真係難，你知我平時都唔係咁嘅！」
而陳偉琪同Sadelle亦會扮演女友，陪玩家食雪條、打泰拳遊市集等等。隻game要戴VR眼鏡至玩到，基本下載係免費，個別場景同故事發展就要畀錢至有得玩，7月31日幾位女角會喺動漫節會場見大家同埋一齊玩呢隻game，不過簡淑兒昨日上咗佛山拍張衛健嘅《大帥哥》要9月初至返香港，所以到時獨欠佢，想見佢可能真係要download隻game喇！