TVB《同盟》播到9月中就結局，緊接嘅《使徒行者２》都幾令人期待，有三哥苗僑偉又有陳豪同埋Benz雄等強勁陣容；但係喺最新嘅宣傳片入面，竟然唔見咗演大反派嘅陳豪，陳豪電話回覆《香港01》時就話：「up to them！」唔得閒理喇！

《使徒行者2》依然有卓Sir苗僑偉同歡喜哥許紹雄，但因為上一輯嘅林峯、佘詩曼都已經離巢，所以新加入咗陳豪演大反派、仲有張兆輝、周柏豪、黃翠如、宣萱等。

今次其實係《使徒行者》嘅前傳，陳豪唔單只係大奸角，飾演陳豪女友嘅宣萱仲會移情別戀鍾意咗三哥苗僑偉，剩係呢段恩怨情仇都有排講，陳豪嘅戲份當然拍得住苗僑偉。

之但係喺最新嘅宣傳片入面，陳豪竟然冇咗影，喺35秒嘅預告中幾乎出現所有重要角色，三哥好多大頭同對白，袁偉豪槍戰、黃翠如喪喊、張兆輝落車、許紹雄揸槍、周柏豪被打、宣萱受傷，洪永城扮型、連巴斯光年鄧梓峰都有幾句對白，但偏偏就唔見陳豪喎！

而呢段宣傳片集中圍繞住三哥同周柏豪嘅主線，TVB嘅偏心程度非常明顯。

就算睇番今年3月嘅搶先預告片，陳豪亦只係出現咗3秒，一個鏡頭係打交幾乎連樣都睇唔到，另一個鏡頭係陳豪坐喺酒店房望窗，大wide shot兼側面又係睇唔到樣，第三個鏡頭又係打交，第四個鏡頭終於大頭見到陳豪撥頭髮，４個鏡頭3秒就完咗，唔通陳豪真係淪為閒角？

《HK01》就致電陳豪，佢話工作緊好忙但都講咗幾句：「比較忙冇睇（新預告）呀！（你完全冇出現）因為我反派卦！冇嘢嘅我做演員嘅，盡咗自己責任就夠。」但問到會唔會怕俾三哥搶鏡，陳豪就有啲酸溜溜：「Up to them（隨得佢哋）啦，我好放心交俾佢哋。」就隨即收線。

《使徒行者2》最新宣傳片：