【BB來了】拍攝BB時間要計到準　黎諾懿：每日要同時間競賽

劇集《BB來了》嚟到尾聲，除咗劇情夠貼地加上演員演技出色，贏盡收視口碑之外，連一眾BB演員都成為焦點。劇中男女主角黎諾懿和李佳芯有個可愛囡囡允豬，為咗配合允豬由初生到一歲嘅成長階段兼預埋BB輪班出場，劇組喺70個BB入面，精挑細選咗8個BB飾演允豬呢個角色。

【BB來了】奶爸勁受歡迎　網絡世界湊仔公吸粉無數

雖然諾懿出道以嚟拍過無數劇集，亦同過唔少對手交過戲。不過講到「最難搞」一定係BB，諾懿就透露：「BB每日只會拍攝3至4個鐘，但有一半時間都係換片、食奶同瞓覺，所以每日要同時間競賽。」跟據劇組透露，拍攝BB要時間為0800至2300之間，最多４小時，通常夜晚10點前收工，因為都唔想家長同BB太夜返屋企，而無綫通常下晏4點開廠，基本上一開始就會搶拍BB的戲份。

而係挑選BB方面，據知除咗係外形上要夠得意之外，最緊要就係肯跟人，唔易喊，難怪諾懿話今次好幸福：「所有BB都好乖，都可以喺時間限制以內做到所有嘢。監制同導演都好有經驗，拍BB拍得好快。」

僱用兒童藝員限制多多，所以成部劇嘅拍攝過程，諾懿就話一切都要BB行先：「每日都係開早廠，但成班演員都好合作，大家明白呢個問題存在，所以合作得好順利。可能我都有個囝囝，所以允豬豬一喊我都大慨知佢哋想點。而且除咗Ali之外，好多演員都有湊開BB，所以拍起上嚟如虎添翼。」

至於會唔會俾小春雞做童星，諾懿就話暫時唔會：「因為我唔想佢太快入呢行，始終呢行都係複雜啲，想佢有個快樂童年，自己鍾意做咩就做咩，可能淨係接一啲活動同廣告，至於其他拍攝就暫時唔會住。」但諾懿就話拍呢部劇嘅時候拍得好開心，第一次同佳芯合作已經好有火花，所以嚟到結局篇都好唔捨得，希望快啲可以拍續集。