【專訪】譚俊彥試過窮到冇錢開飯:幫人影印仲要穿櫃桶底偷兩蚊

撰文:
最後更新日期:

「其實我好悶,我每一日都會彈同一首歌,我覺得係一件可以抽離嘅事。」這是譚俊彥(Shaun)說的,《 INTO THE ARENA》這首歌曲由2016年彈到現在。其實無可否認Shaun是需要抽離。無他,自出道以來一直被籠罩在父親的影子下工作。總不乏人們對他說:「你咪係狄龍個仔!」卻叫不出他的名字譚俊彥。另外回流香港工作後,又被稱為「收視毒藥」,雖然口中說習慣了,但處身於他立場,也不會好受。

TVB生態係一個淘汰賽

譚俊彥Shaun在TVB被受力捧,每一套都是男一,現播放的《十八年後的終極告白》又是男主角。譚俊彥坦言聽到閒言閒語,但他承認TVB是有山頭文化,「好多同事都有唔同聯盟,或者一班團體去幫自己或者幫大家。分黨分派一定有,尤其是大公司。好似我剛入到嚟,每一個人都會覺得公司又捧你,係咪你又搶晒人哋啲機會。我覺得其實係一個淘汰賽嚟,尤其是喺TVB環境,你一要增值自己,做好自己咪就唔會畀人淘汰。」

唔好睇Shaun好cool咁,其實佢份人真係好好笑。(梁碧玲攝)

演員嚟講,Shaun形容只係一份工作。(梁碧玲攝)

初入TVB拍《天命》即做男主角

《十八年後的終極告白》是譚俊彥在TVB中第五套擔正的劇集,2018年《天命》是譚俊彥入無綫的第一套劇集,播出時候觀眾應該會有一種感覺,「呢個男主角邊位呀?」始終譚俊彥是在內地發展時間比較長,觀眾對他陌生是無可否認的事,而《天命》播出後確實收視不如理想,他說:「拍個個時候冇呢個感覺,因為覺得都係拍戲。我出道都係同梅艷芳拍戲,簽TVB之前都係同謝霆鋒與劉青雲拍電影,尤其電影業好多朋友,認識好耐。然之後我發覺TVB觀眾同電影觀眾係兩批人,重新要打入觀眾層面真係好困難。」

點擊睇《十八年後的終極告白》譚俊彥的演出劇照!

+9
+8
+7

Shuan覺得TVB特色係會令到演員好攰,因為經常要開好多個鐘頭工。(梁碧玲攝)

被稱收視毒藥受打擊:當時真係好逆境

《天命》其後播出的是《特技人》及《包青天再起風雲》,可是這兩套收視亦不如理想,在網上評價也一面倒,因此譚俊彥Shaun更被封為「收視毒藥」,他毫不避諱說:「我好難唔睇《香港01》,咁大個字寫收視毒藥,呢句我要望鏡頭講。冇嘢嘅,我成日都話順境波又要打,逆境波又要打,當時真係好逆境。你話會唔會唔開心,咁緊係會啦,我會諗我嘅演戲生涯會唔會完結,我都係一個好悲觀嘅人。要知道觀眾好可能十單唔會記得,但衰一單或兩單永世就要揹負呢個名,唯有沉住氣做。」

Shuan好接受大家對佢嘅評價。(梁碧玲攝)

窮到穿櫃桶底

談到逆境,Shaun坦言接近40年的人生是經歷了不少逆境,無論現在還是以前。年輕的時候他身在國外讀書,曾有段艱辛日子令他連日常生活三餐也會有問題出現的情況。大家可能有個疑問包括記者都有這樣的想法,作為狄龍兒子,他的成長果程其實應該會無風無浪,物質上應有盡有,從不缺乏,當然這只是大家對他的想法。他說:「好多人會講攤大手板咪得囉,但我覺得好難,我會覺得對唔住自己。其實大家都試過冇錢交房租,食飯真係搵散銀出嚟俾。我都可以講呢個,我試過穿櫃桶底,當時加拿大幫人做影印,咁我就拎咗個$2,當然之後冇再咁做,因為知道冇理由為咗少少事情放棄你前途。」

Shuan直言:「人未試過冇錢你唔會肯去儲蓄。」(梁碧玲攝)

狄龍個仔都係冇優待

步入社會工作後,加入娛樂圈,Shaun被情緒問題困擾,除了要接受「狄龍兒子」這個標籤了接近二十年的演藝生涯,有段時間沒有工作亦是壓力主要來源,「作為演員好多事情唔穩定,收入唔穩定,情緒唔穩定,開工時間唔穩定。以前會飲酒解決情緒問題,放棄自己都試過,我試過有一段時間冇工開同冇晒錢。」不過現在的他處於穩定期,更戒掉了飲酒的習慣,始終組織了家庭,有了小孩需要照顧,不希望身上有酒味。

經過4年努力,成功打入電視觀眾層面,Shaun感恩現在外出別人開始不叫他做狄龍個仔,而是叫他譚先生。(梁碧玲攝)

童年缺乏父愛

從少時候開始Shaun會幻想組織一個家庭,原因是小時候缺少父愛。狄龍當年是事業高峰期,要忙著兼顧影視工作,Shaun有可能一星期只會見到一次或兩次父親,「我成日都好嚮往爸爸拎住公事包,返到屋企會講今日過成點,然後返到學校再同朋友講呢啲。我細個真係冇,所以我希望依家比較多啲時間陪小朋友。」

Shaun笑言自己是家中一名小朋友,因為覺得自己長不大又依賴老婆。(IG:tammerz)

狄龍:你會激X死我

記者印象中的狄龍是一個很「大俠」、嚴肅、有霸氣的一位演員。有趣的是經過這次訪問Shaun能了解多點這位前輩,原來在螢幕上看見的他和回到家中的他也是一名「大俠/包青天(曾經狄龍演包青天是他演戲生涯其中一個經典角色)」Shaun笑言:「其實佢對我好嚴格,佢唔畀我瞓到好晏,大家都知年輕都係夜晚活動。有一次佢同我講『你知唔知道瞓超過12會死人』,我諗緊點解會死人,我上網搵下,佢好認真同我講『你會激X死我』我一開頭都唔明,但之後都明。佢係一個好傳統嘅人。不過好多謝佢呢個嚴格令我學識好多演員基本,唔遲到,背熟對白。」

好溫馨。(IG:tammerz)

狄龍包青天不再 從此成為慈祥爺爺

Shaun與妻子育有一子一女,狄龍自從榮升為爺爺這個角色後,狄龍不再是一個威嚴的人,立即成為慈祥爺爺。這改變令Shaun都嚇一跳,不過也理解爸爸這個心情,他說:「佢成日都會買好多玩具俾佢哋,叫佢哋記住係佢買,好搞笑。我以前唔係咁,佢好惡,食飯時候會用筷子打我手。依我未開始鬧佢哋時候,佢就叫我唔好咁惡,嚇親啲小朋友。我心諗我嚇大架大佬!不過孫用嚟蹤,要用嚟錫,我都明。」

點擊以下圖片睇更多Shaun專訪內容講乜!

+16
+15
+14


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。