梅艷芳曾遍尋梅愛芳兒子下落 姨甥潘文皓:聽到真係覺得好難過

撰文:陳芷穎
出版:更新:

電影《梅艷芳》上映以來叫好又叫座,電影內容及相關新聞成為歌迷及戲迷熱話。電台節目《舊日的足跡》主持車淑梅成功專訪傳聞與梅艷芳失聯21年的大姨甥潘文皓,近日有報道指潘文皓日前在 Facebook中表示已經看了《梅艷芳》三次,並在帖文中抒發了感受。淑梅姐成功透過長途電話專訪身在加拿大的文皓,他表示深深被電影感動長期處於流淚狀態,亦感激姨姨(梅艷芳)留給他和弟弟的教學基金,讓他們可以順利完成大學並找到好工作。

電影《梅艷芳》上映以來叫好又叫座,電影內容及相關新聞成為歌迷及戲迷熱話。(劇照)

足本對話如下:

潘文皓:「係嘅,我睇咗三次,第一次嘅感覺難以形容,長期處於想流淚同流緊淚嘅狀態,再睇第二次、第三次都有唔同嘅感覺,有好多地方好感動。當見到媽咪同姨姨喺舞台表演嘅時候,我眼淚不禁流落嚟,我可以親眼見到佢兩個寶貴嘅姊妹情,我細個嗰時見唔到嘅。媽咪走嘅時候我七歲,姨姨走嘅時候我11歲,我唔喺佢身邊。有日,我同王丹妮通電話,當時佢喺香港嘅戲院謝票,透過視像講咗幾句,佢戴上口罩眼神好似(姨姨),嗰陣時我好感動,有機會真係想同佢傾多幾句。」

淑梅姐:「你係咪一直喺溫哥華?」
潘文皓:「其實六年級開始就喺呢邊生活喇!當我知道有呢套電影,我一定要睇,裡面一定會講好多有關媽咪同姨姨嘅事,爹哋、細佬都有睇。印象中,媽咪(梅愛芳)係一個好稱職嘅媽咪,好畀心機教我同細佬,腦海裡邊好難想到一個畫面佢鬧過我哋。佢係一個好積極樂觀嘅人,遇到乜嘢難題都係笑住面對,正如電影情節一樣。姨姨係一個好直、好有為、好堅強嘅人,佢好鍾意講笑令身邊人開心,時時刻刻為人哋設想。細個嗰時我有少少驚佢,因為佢把聲好有力量同埋威嚴,有冇俾佢鬧過我唔記得,但係我真係有少少驚佢,我知道佢係大明星,佢係個永不放棄嘅人,電影中佢話『只要有信心、世上無難事!』呢一句正正喺佢生命話俾我哋聽。」

潘文皓表示深深被電影感動長期處於流淚狀態,亦感激姨姨(梅艷芳)留給他和弟弟的教學基金,讓他們可以順利完成大學並找到好工作。

淑梅姐:「你知道姨姨一直搵你哋嗎?」
潘文皓:「我只係呢一排先知道,當年我哋唔喺香港,唔知佢搵我哋,如果知道,爹哋一定會帶我同細佬返嚟見佢,所以當我知道佢一直有心搵我哋,亦係佢臨終前一個心願,我真係覺得好難過。我而家大個咗,可以幫佢完成心願,即係佢可以搵番我哋喇!其實呢兩三年,我有同姨姨嘅fans聯繫返先至知道有呢套電影,我先至知道有呢一件事,係佢哋話俾我知。」

淑梅姐:「你哋嘅近況如何?」
潘文皓:「我28歲,有女朋友未結婚,我而家做IT工作。細佬都好好,佢都係做IT電影後期嘅工作。爹哋好好,身體好好,好健康。我都想返香港,如果可以,我嚟緊呢半年內會返,上次2017年返過嚟,今次我會探婆婆,佢 98 歲,我好想返去見佢。」

淑梅姐:「身為媽咪同姨姨嘅新一代有咩感覺?」
潘文皓:「其實當我知道今次有咁多人仲係掛住佢哋,我好感動。做媽咪嘅仔、姨姨嘅姨甥有種壓力,我好想好似佢哋咁樣,好想學識佢哋嗰種生活態度、處事方式,因為我覺得佢哋好堅強、好樂觀積極!」

(劇照)

淑梅姐:「你喺Facebook嘅中文寫得好好,有咩原因呢?」
潘文皓:「我一直喺溫哥華生活都有睇無綫,因為有字幕,所以我記得。我聽日會睇(《梅艷芳》)第四次,隔幾日睇一次,直到落畫,因為每一次都有唔同感受。我覺得Fish(廖子妤)好似我媽咪,特別佢短頭髮嘅時候,我好多時會睇返以前啲相。三次睇都流眼淚嘅就係見到姨姨探媽咪,媽咪病床上有張相見到我同細佬,佢望住話唔知可唔可以睇住我哋長大,就係呢一句,我聽到好難過。好遺憾佢唔可以睇到我哋長大,但我想同媽咪講,佢喺天上一直看顧住我同細佬,所以我哋唔可以做一啲令佢失望嘅事,我會好好咁生活落去。姨姨佢嗰種精神,將所有精神同時間貢獻畀歌迷、音樂、舞台,遺憾佢冇結婚,最終嫁咗比舞台同大家,佢呢個態度好值得大家敬佩!我希望佢知道而家仲有好多人繼續愛佢,掛念佢。我要同電影團隊講,我好多謝佢哋,呢段時間到處都有疫情,要為大家打氣,電影帶出咗呢種正能量同態度,值得我哋學習,好多謝佢哋!」

淑梅姐:「有咩要對媽咪同姨姨承諾?」
潘文皓:「就係我要好好成長,好似佢哋咁對自己同對身邊嘅人。姨姨講過希望有一晚,大家食完飯出去望住星星嘅時候,會記得佢,一個曾經為我哋帶來小小歡樂嘅朋友,會記住佢個名叫做梅艷芳,我會一路一路記住佢哋,永遠永遠以佢哋為榮!」文皓於專訪末更特別補充:「其實我同細佬好想多謝姨姨留俾我哋嘅教學基金,等我哋可以順順利利咁讀完大學,而家又有一份幾好嘅工作。」

+4

同場加映

《梅艷芳》圓梅姐尋親遺願 姨甥潘文皓失聯21年現身:懷念着你

+23
你可能感興趣