英皇高層霍汶希（Mani）一向被譽為娛樂圈中最美的「金牌經理人」，她在2011年於美國低調誕下囡囡，多年來一直母兼父職，獨力湊大囡囡，但她就極少讓女兒曝光。日前Mani在IG曬出一張囡囡的游水照，並寫道：「親子日！簡單快樂。#已由細路女變做少女 #唔捨得佢大得咁快。」雖然只影到囡囡上半身的背面，但都睇得出囡囡已經長得亭亭玉立，湯怡亦有留言：「咁大個喇！Hanni每日都咁快樂。」

有「小林青霞」之稱的Mani早在14歲時就被星探發掘，在電影《七兄弟》中飾演童年林青霞，其後開始接觸模特兒工作，之後再轉型成為經理人，一手栽培了謝霆鋒、Twins、容祖兒（Joey）、陳偉霆等藝人。2013年Mani在微博自爆早於2011年誕下一女，對外公布成為單親媽媽，她透露當年與男友分手後才發現自己懷孕，經過考慮後決定獨力撫養囡囡。而Mani不時在社交平台分享與囡囡的點滴，轉眼間寶貝女Hanni已經10歲大，相信Hanni將來一定會像媽咪一樣靚女！