前「東張女神」林希靈同陳安立下月結婚 密密造人：想要兔年BB
撰文：林迅景
出版：更新：
陳安立、林希靈今日（23/10）出席健康運動博覽的活動。陳安立笑言今日是「最後一次」情侶檔搵食，原來因為他們婚期在即。他說：「因為下次就係『夫妻檔』，希望婚後都會密啲一齊開工！其實我係比希靈呃咗，因為佢話佢超鍾意運動，點知拍拖後先知佢咁懶。有一次同佢跑馬拉松，希靈去到最後階段想放棄，我即時喺佢耳邊唱『紅日』幫佢打氣，成功激嬲佢跑快啲。」
陳安立、林希靈今日（23/10）出席健康運動博覽的活動。
林希靈聞言則反擊，表示陳安立的歌喉似技安，並且禁止老公在婚禮獻唱。她說：「因為太多人婚禮唱歌走音，俾人拍晒上網周圍傳，我唔想俾人笑所以佢唔準唱歌！而家距離婚期仲有一個月，我哋仲未派帖，搞到啲朋友以為我哋唔請佢嬲咗我哋。」
林希靈同陳安立差不多要結婚了。（IG圖片）
講到婚禮兩位準新人眉飛色舞，林希靈更表示得到朋友介紹「教生仔」偏方。她說：「佢哋話『潤滑劑』可以揀生仔定生女，而家成班補藥黨係咁sell我！而陳生話想要兔年BB，本來都不以為意，點知計數下年就係兔年，我怕我生唔切咋！」