收視多少有時不能反映一切，好像ViuTv《詭探》，收視輸給《蘭花劫》一條街，網友亦覺得劇集有很多進步空間，那《詭探》製作係咪事事旦旦呢？絕對不是，如果大家未睇13集（週四），就一定要翻睇，特別係飾演劉錫賢太太的陳秀峰（前名：陳燕航），那場戲她擔住支煙鬧劉錫賢廢柴，陳秀峰戲當然好啦，但重點是支煙，因為這場戲拍了不少時間，而劇組為了支煙連戲用了不少功夫。陳秀峰接受《香港０１》訪問時說：「支煙佢哋會幫我度住個長度，嗰場戲好短，但我食咗十幾支煙㗎。其實我唔食煙㗎，劇組會幫我點埋，又會幫我揸住，計住每支煙嘅長度，目的就係想連戲，真係好細心㗎。你拍電影都未必有佢哋咁仔細呀。」嘩！為了支煙連戲可以去到咁盡，你可以話《詭探》團隊吹毛求疪，但這就是認真，所以一定要翻看13集這一場戲，還要拍住手掌睇，向劇組致敬。

除了認真看待支煙，劇組對陳秀峰亦十分尊重，更為了她改劇本，她說：「原本劇本講我俾劉錫賢揑死之後，講佢打開我個腦擺蟲落去，有好多腦漿嘅，好血腥嘅，跟住啲蟲係我個頭週圍行嘅，我睇劇本已經覺得好恐怖，但我同劇組講蛇蟲鼠蟻，我最驚真係拍唔到，我係成個人震晒，唔會拍得好㗎，但導演同製片好好，即刻同埋編劇開會商量，為咗我改劇本，拍咁耐劇都未試過。我覺得佢哋好尊重同體諒演員，我嗰日其實重感冒，但我都死頂落去，因為見到班Crew咁為自己，一定要做好畀佢哋。」