黃建東深圳拍劇感冒致左耳失聰：醫生要拮穿左耳膜抽積水出嚟

雖然話小病是福，但感到不適就要盡快求醫。近日在內地拍劇的黃建東，驚傳左耳失聰，他在IG寫下長文：「冇咗聽覺先發現原來聽唔到嘢係咁辛苦。」

黃建東上載多袋藥物照片留言，指上月深圳拍《黑色月光》時感冒，頂硬上完成拍攝再返港睇醫生：「兩三日前隻左耳突然聽唔到嘢，好似潛咗落水底咁，個耳膜仲有啲脹痛，但係仲要喺深圳拍埋先。好驚聽唔到 cue同埋對手講對白，又唔敢話俾人知，係咁用隻右耳嚟聽。深圳一殺青第二朝返香港即刻去睇耳鼻喉專科，原來感冒菌入咗鼻同耳變咗鼻竇炎同中耳炎然後變咗耳積水。」

完成工作再睇專科，失聰情況已經變得嚴重令黃建東都相當擔心：「醫生要拮穿左耳個耳膜抽返少少積水出嚟，但係個左耳感覺仍然喺水底，同埋仲有好多積水滲緊出嚟。我睇過啲報道話中耳炎如果唔及早醫的話，聽覺有機會會永久受損變成弱聽。冇咗聽覺先發現原來聽唔到嘢係咁辛苦，同世界所有人同事都好似有段距離咁。啲人一講嘢細聲啲我就已經聽唔到，同埋唔知道自己講嘢夠唔夠大聲。好想快啲好返。好想隻左耳快啲聽返嘢。」