【每逢大事講故事】啞忍野蠻Bibi八年 奧巴馬卸任在即大振夫綱

撰文:
最後更新日期:

又到年尾,又係人事變動嘅日子。雖然美國總統同飛雲一樣,都冇年尾花紅同雙糧,但奧巴馬唔同嘅就係佢將會係1月離職。臨近卸任,通常都係做又三十六,唔做又三十六,但奧巴馬呢期就動作頻頻,最大嘅核彈,可謂係聯合國議案表決中罕有同「野蠻女友」Bibi唱反調,就以色列殖民區問題投下棄權票,令聯合國通過反對議案,要求以色列停止再起殖民區。

吓?邊個Bibi?

呢個眼神係幾咁似曾相識,十足十我老豆對住佢老婆心諗:「我究竟做錯咗啲咩要對住佢?」(Getty Images)

Bibi,呢個名真係好港女,好港女呀⋯⋯據說呢個係以色列總理內塔尼亞胡(Benjamin Netanyahu)屋企人叫佢嘅乳名嚟嘅,不過依家連奧巴馬同埋《紐約時報》都好鍾意Bibi Bibi咁叫佢。

聽講內塔尼亞胡本人其實唔係好鍾意人叫佢Bibi。

美國同以色列的愛恨情仇複雜到一個點,既然係咁,不如飛雲就索性用港女同佢男友來講解一下美以關係,等大家容易啲明白點解美國會係奧巴馬卸任前幾星期,突然投下棄權票,令聯合國通過叫停以色列興建殖民區嘅議案

通過議案的一刻,全場拍掌……

要了解奧巴馬同Bibi嘅關係,唔可以唔提嘅就係Bibi嘅出身。呢位以色列總理高中時赴笈美國,畢業於麻省理工大學。曾經做過以色列駐美大使同埋以色列駐聯合國大使。有呢個背景,Bibi唔單止一次同身邊人講,佢對美國嘅認識,係以色列佢認第二,冇人敢認第一。政府內閣討論政策時,當有人提出唔知美國會有咩反應時,Bibi通常都會講:「美國就留返比我處理啦。」霸氣盡現。

Bibi年輕時同佢爸爸的合照,佢爸爸曾經是美國康奈爾大學的歷史教授。(網上圖片)

由於歷史原因,近代美國歷任總統都同以色列稱兄道弟,簡直可以用處處維護嚟形容美國對以色列的溺愛。美國為咗氹掂以色列,係聯合國安理會會議中,曾經以常任理事國身份行使否決權近百次,而當中有三分一都係關以色列事。

所以,當奧巴馬係2008年上任時,Bibi都好有自信咁認為自己會同奧巴馬相處得十分愉快。不過到後來,Bibi就以「夫婦」(married couple)來形容二人關係。兩個人同床異夢,但為咗一啲共同利益將兩人綁埋一齊,聽到都覺得sosad。

究其原因,同一般情侶關係轉差一樣,Bibi根本太唔清楚奧巴馬諗緊咩,而殖民區同埋伊朗就係雙方最大的分歧。奧巴馬一上任已希望透過和平進程令巴勒斯坦立國,只不過Bibi冇將呢樣嘢放喺心,以為奧巴馬只係得把口。

▲相中可見,後面紅色屋頂就是以色列興建的殖民區,環境不錯。錯在這是興建在巴勒斯坦人的土地上,更甚的是,以色列更以安全為名,興建隔離牆隔離巴勒斯坦人,令巴人尤如生活在一個巨大的露大監獄一樣。

【專頁:新聞講故事】國際大事一看就懂:最易入口的新聞!趣味養份兼備

相對過往的總統,奧巴馬對以色列的態度可說是相當有guts。他上任的第一天就打比巴勒斯坦自治政府主席阿巴斯,比時任以色列總理奧爾默特仲要早。

冰封三尺非一日之寒,有幾件事令到奧巴馬同Bibi愈嚟愈睇唔順眼對方。時間撥回2009年,兩人在奧巴馬當上總統後的第一次正式會面。呢個會議原本預計只開一小時,但最後足足傾咗兩粒鐘。原因:奧巴馬突然在會上要求Bibi要完全凍結所有殖民區的活動,而且愈快愈好。聽到奧巴馬咁嘅要求,Bibi當堂呆一呆,情況就好似叫個購物狂女友從此唔准再shopping一樣。即使要顧及形象,內心都一定大叫……NO

據與會者透露,Bibi開完會出嚟時,塊面真係黑過鑊底。

令到關係繼續變差的,仲有之後奧巴馬出訪中東之旅,竟然skip咗以色列。

可能係因為Bibi詐哂型,於是奧巴馬返到美國之後就打比Bibi同佢傾電話。你知啦,通常氹人嘅電話都唔會短,講到攰攰地,奧巴馬索性將隻腳放上枱繼續傾。點知將相比白宮內的攝影師影咗,第二日仲連同一份兩國元首通話嘅新聞稿對外發放。呢,就係呢張,係咪有啲印象?

對於呢張相,以色列媒體大造文章,話奧巴馬究竟知唔知,用鞋底對住人係一件好唔禮貌嘅事。Bibi有冇因為咁覺得不被尊重同被羞辱就冇人知,不過自此之後,兩國媒體基本上已認為兩人欠佳的關係難以逆轉。

雖然冇咩嘢真係做到,但奧巴馬係以巴問題上,已經較以前嘅美國總統無咁偏幫以色列,不過已足夠令到玻璃心Bibi唔高興。

好似伊朗問題咁,Bibi認為伊朗核問題會對以色列造成威脅,但奧巴馬竟然冇打算幫佢出頭!係呢一刻,Bibi心裏面不禁浮現咗港女一般好鍾意掛係口邊嘅「你(美國)對我已經唔係好似以前咁」⋯⋯而呢件事就造就咗著名嘅「Bibi卡通炸彈事件」啦。

Bibi唔止個名好港女,佢行為都有港女咁可愛㗎,既然無人幫自己出頭咯,咪自己嚟囉。2012年係聯合國發表演講時,佢就帶咗張炸彈卡通圖,話伊朗真係好dangerous(即係好危險囉),一年後就有製核彈嘅能力。不過,堂堂start-up大國整張咁low-tech嘅卡紙,唔講我以為張卡通係幼稚園講故事啲storyboard添呀。

▲原圖……真係咁架……Bibi講解緊伊朗有幾危險(GIPHY)

網民就當然唔會放過笑佢嘅機會,所以就整咗一系列meme

又有人笑佢個炸彈十足十係華納兄弟啲卡通片到偷出嚟咁。(網上圖片)

【專頁:新聞講故事】國際大事一看就懂:最易入口的新聞!趣味養份兼備

自奧巴馬上任之後,美以關係可以話陷入谷底,不和白熱化,而Bibi同奧巴馬之間嘅冷戰亦都係有目共睹。《大西洋月刊》(The Atlantics)著名記者戈爾德伯格(Jeffrey Goldberg)就爆出過,白宮一名高級官員忍無可忍,鬧Bibi係「雞屎」(Chickenshit)。咁新鮮?牛屎我就聽過人鬧姐?原來鬧人雞屎係更加侮辱,呢個字來自二戰時士兵用以形容牛屎都不如嘅垃圾軍規,簡單啲講,即係「膠都廢事比」。

▲Chickenshit? 我都唔知你講咩~(Giphy)

飛雲聽聞01好鍾意玩睇新聞學英文,不如一齊睇吓白宮用過咩形容詞形容Bibi?

recalcitrant(難以馴服), myopic(目光短淺), reactionary(極端保守), obtuse(愚鈍), blustering(咄咄逼人), pompous(自命不凡), Aspergery(亞氏保加症,自閉症的一種,有明顯社交障礙及重複特定行為)

鬧人都鬧得咁多元化,亦發現原來白宮都幾毒舌,長知識了!

▲唔好爭啦,一人一半又好,成條比我又好啦。(Giphy)

奧巴馬當年眼見中國係亞洲影響力日漸坐大,就好想快快手搞掂以巴問題,將外交政策列為「重返亞太」,更加任命反對殖民區米切爾(George Mitchell)為中東特使,希望落實兩國方案,推動以巴和平。但Bibi同阿巴斯之間一直未能就國土問題達成共識,霸道Bibi繼續擴充猶太殖民區。

奧巴馬甫上任已經想著手處理呢個殖民區問題,巴勒斯坦自治政府主席阿巴斯要求國界根據停火協議劃定的綠線(Green line)而定,敦促以色列「唔好過界」。但半個世紀以來,以色列係呢個定義底下的巴勒斯坦領土建立大大小小的殖民區,共計57萬人遷入,更將非法侵佔嘅殖民區當成國土一部分。

相關文章:聯合國譴責以色列 克里為美國投棄權解畫︰保護「兩國方案」

我唔要呀!咩兩國方案呀!全部都係屬於我!(網上圖片)

兩個方案(two-state solution)本來為紓緩以巴衝突一個折衷方法,方案主張居住於巴勒斯坦境內的猶太人及阿拉伯人,建立兩個不同國家(two states for two groups of people),在阿拉伯人聚集的約旦河西岸(West Bank)同加沙走廊(Gaza Strip)建立巴勒斯坦國,與以色列和平共處。

試諗諗,個情況就好似你平安夜、聖誕節、除夕倒數、大年初一、情人節,都比曬女友,我都係想同契妹過個佛誕姐?你咁都詐我型?公平咩?

枱面上,今次奧巴馬團隊係聯合國表決數小時前先至決定投棄權票,令譴責以色列殖民區議案得以通過,但有白宮官員證實,奧巴馬一行人已經關注咗議案成年,反映奧巴馬已經對野蠻Bibi忍無可忍。

相關文章:以色列報復議案通過 宣布再建殖民區 兩國方案壽終正寢?

▲我有得揀咩?我有得揀咩?我有得揀咩?(Giphy)

美國投棄權票背後,Bibi控訴巴勒斯坦阿巴斯係度搞事,同美方達成秘密協議。阿巴斯就好似個契妹咁,你又唔可以完全唔理佢感受,佢楚楚可憐咁望住你,同你講巴勒斯坦人民連水都冇得飲,1995年簽署推動以巴和平嘅《奧斯陸協議》時,已經將80%水資源都分配咗比以色列,而家以色列仲要得寸進尺,要求增加殖民區用水。

以色列駐美國大使德爾默(Ron Dermer)就指控奧巴馬政府是聯合國決議的幕後黑手,指佢夾埋聯合國,一齊阻止以色列在約旦河西岸繼續建造猶太人殖民區。簡直係哭訴:「你哋夾埋嚟蝦人嘅!」

相關文章:以色列殖民區愈建愈多 霸佔巴人水源步步進逼

▲你地蝦人!扁嘴仔(Giphy)

而2015年一次訪美行程中,冷戰意味就更明顯,Bibi竟然繞過奧巴馬,以眾議院院長博納(John Boehner)為主要拜訪對象,令Bibi親共和黨嘅立場更加表露無違,而奧巴馬亦都不甘示弱,表明唔會見Bibi。

相關文章:聯合國通過譴責以色列 美國為何投棄權票 七條問題值得留意

「我唔見你呀!」「係我唔見你囉!」(應該係設計對白)(網上圖片)

男人唔壞,Bibi唔愛~奧巴馬都未正式卸任,特朗普同Bibi已經眉來眼去。特朗普當選後,Bibi第一時間拍咗條短片恭喜佢,咀角含哂春咁話特朗普係「以色列嘅好朋友」,多謝佢咁多年都支持以色列。

至於特朗普,身為候任總統,佢先安撫叫Bibi忍耐多一頭半個月,再寸埋聯合國都係一班口水佬,只係一個供人玩樂的俱樂部。競選期間,特朗普都曾經揚言要將美國大使館由特拉維夫搬至耶路撒冷,變相承認耶路撒冷為以色列首都。更提名鷹派人物弗理德曼(David Friedman)出任以色列大使,佢明確表示過唔會支持兩國方案。奧巴馬振夫綱?季尾先黎發力,巴基之星咁好後勁都追唔返啦。

如果你以為特朗普係癡心情長劍,可以樣樣嘢都為咗以色列去做,少年,你太年輕了。到時就知咩叫比人捧上天再撻返落地啦,Bibi。

相關文章:【2017前瞻】豪言力撐以色列 特朗普恐令以巴戰火重燃?

【專頁:新聞講故事】國際大事一看就懂:最易入口的新聞!趣味養份兼備



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。