【專訪】走出象牙塔變旅行社老闆　沈旭暉：感覺到自己存在嘅價值

他畢業於耶魯牛津、年紀輕輕晉身中大副教授，更令沉悶學科成功「入屋」。在外人眼中，沈旭暉（Simon）無疑是個「人生贏家」，但他沒有留戀，反而選擇在他口中的「三字頭大限前」，走出安穩的「象牙塔」搞生意。
屈指一算，沈旭暉有份參與的初創項目多達20個，其中旅行社GLO Travel成立短短4年，營業額已突破8位數字，成績驕人。
商業與學術走在一起，原來一點也不「 銅臭」。沈接受《香港01》專訪時剖白背後思路，並坦言創業更能令人感受到存在的價值。他相信，隨着香港人去旅行愈玩愈刁鑽，深度遊市場將長做長有，更「預告」有意進一步涉足「超深度遊」。

「其實我未完全準備好向公眾講我嘅計劃。」Simon呷了一口咖啡，緩緩說道：「始終好多都未係好成熟，仲係實驗當中。但心理感覺係開心過做一個純粹嘅學者，因為會感受到自己存在喺世界嘅價值。」

創業圍繞國際關係　「落到地係最難」

此番說話出自一個學者口中，聽着總覺有點格格不入。但單用「學者」來形容沈旭暉，或許不盡準確，事關他除了大學副教授一職，同時身兼旅行社共同創辦人、Cafe合夥人、編程（Coding）學校創辦人、上市公司非執行董事、報章主筆等「N重身份」。對於學術界的官僚作風，以及學者之間的「影響因子遊戲」，他亦一如過往的表示輕蔑：「你唔會透過出一次《China Quarterly》（一本著名學術期刊），而覺得自己好有影響力，但我依家起碼做緊啲實在嘅野，而且落到地，呢樣正正係我哋圈子入面最難。」

雖然對「象牙塔」內的種種「嗤之以鼻」，但Simon的創業項目，包括旅行社、未來學研究社、Cafe等，仍無一例外與國際關係有關。背後初衷，或許與他10多年前開始於Facebook「抽水」、以「研究大溪地」為由訪問官恩娜等同出一轍，「比起喺大學入面講中美關係、特朗普、貿易戰，咁樣可以令國際關係同我哋生活拉得更近，而我相信最終兩件事係可以掛鈎。」他認為，國際關係要「入屋」，一定要與普通人的生活體驗互相連繫，「譬如可唔可以搞個旅行團，探討中美貿易戰對唔同地方、物價有咩影響？否則你就咁寫一篇文，除咗炒股票嘅人，根本無人會理啲匯率之類嘅嘢。」

港人玩得「刁鑽」　旅行社生意上正軌

沈旭暉手上芸芸創業項目中，最為人熟知的，不得不數他與幾位友人合作創辦的旅行社GLO Travel。2014年成立的GLO Travel專營文化深度遊，行程「要幾冷門有幾冷門」，足跡更由最初的北韓，逐漸擴展至伊朗、不丹、烏克蘭等國。Simon透露，目前GLO Travel的業務發展已漸上軌道，「由最初只係兩三個𡃁仔玩玩吓，玩到依家，成間公司已經有10個員工、8位數字嘅Revenue（營業額）。」

去旅行有如香港人命根，就連摩洛哥、秘魯等過往鮮見港人足跡的冷門國家，近年亦開始成為熱門旅遊地。GLO Travel生意愈做愈大，是否也因為港人愈玩愈「刁鑽」？Simon反指，其實深度遊的市場需求一直都在，「只係依家社交媒體時代方便咗，令到大家更容易接觸。一啲好遙遠嘅地方，你講兩嘢就即刻近左好多，所以新時代衍生緊一個新嘅市場，相信未來需求都會不斷出現。」

旅行團「搣甩娘味」　揀團友最緊要

然而對年輕人而言，旅行團彷彿總是洗脫不了一種「娘味」，與「無自由」劃上等號。「我其實都係咁諗，所以仲係好怕跟團。」本身熱愛旅遊的沈旭暉亦笑言：「但我跟GLO去過一次，有幾個感覺。例如大家跟團最唔中意『鴨仔團』嗰種Feel，即係影相、打卡、購物，只要避開呢個感覺，其實都OK。」

除了行程編排，去旅行最重要的莫過於身邊旅伴，事關每趟旅行都是一次「友情考驗」，一言不合隨時連好朋友亦「無計傾」。Simon就指，為旅人尋找「啱咀型」的朋友一同出發，正是旅行團最值錢之處，「譬如我啱啱去完塞爾維亞，我揀景點時完全圍繞一個主題，就係鐵托（Josip Broz Tito，前南斯拉夫元首）一生。如果搵到一班人想睇呢啲野，唔單止唔介意一齊去，而且有得交流。但如果同個完全無興趣嘅師奶去，咁咪盞大家痛苦！」他認為，「為旅人找朋友」的策略已有一定成效，「除咗景點、導遊、KOL之外，我發現啲團友仲會開始期待今次有咩團友？坐喺隔嚟個人會唔會教識我某啲嘢？呢個係以前跟團唔會有。」

冀拓超深度遊　湊夠10個人可成團

對於日後旅行社的發展方向，沈旭暉相信要「愈玩愈深度」，最終建立一個更冷門、更小眾（Niche）的市場。他解釋：「最初所謂深度遊，其實只係去一啲另類嘅地方，譬如北韓。但當北韓都慢慢主流化，咁就要試吓搞平壤馬拉松旅行團。」愈玩愈偏，會否怕太「趕客」，市場不受落？「其實外國都有好多類似嘅團，好似塞爾維亞已經有鐵托團。雖然香港無人有興趣，但當香港人去多幾次塞爾維亞，呢類團可能就有空間，因為大家要試新野。」

但「超深度團」距離現實又有幾遠？沈旭暉深信，在社交媒體的時代，要成團其實不難，「只要搵到10個志趣相投嘅人就可以出發，之後就可以不停滾大，呢個我有信心做到！」他續稱，「超深度團」目的地亦不一定是冷門國家，「新加坡可能好多人成日去，但如果有個行程係追蹤住李光耀嘅一生，都會幾特別，我哋都想試！」

GLO Travel發展日趨成熟，加上不經不覺間累積下的一堆商業項目，Simon會否有朝一日也現身港交所大堂敲鑼，為其長長的「Slash」身份添上「上市公司主席」一項註腳？

「隨緣啦！我哋好佛系嘅。」Simon莞爾說道：「其實只要現時手頭上每一件事都成長到，已經會好有趣。就算係失戀旅行團，即使依家賺唔到錢，唔排除有朝一日都會做到好大。每個手頭上嘅項目，只要可以發揮協同效應，自然慢慢可以滾大，最終演變成一個圍繞住國際關係嘅衣食住行生態體系。」