理賠師親爆「呃保險」失敗實錄 憑兩張網上照片 客人賠錢留案底

撰文:
最後更新日期:

好多人心底裡覺得,「保險經紀『Sell』你就天花龍鳳,要賠嘅時候就咩都唔賠,不如放隻招財貔貅喺屋企仲好!」

任職某保險公司理賠師陳穗波(Boris),專職保險索償個案,強調一間好的保險公司,宗旨不是盡可能拒賠,而是根據保單,向客人作合理賠償。

近廿年經驗,令他學會一份執著,指出保險原意,為還原物品受損壞前一刻,警告不可當保險做獲利工具。身為專家的他,從中抽出3單親身接觸奇難雜症,警示「貪心鬼」不要以身試法,遇着慣犯更是絕不手軟,「要篤死佢,等佢冇得翻身!」

陳穗波(Boris)指,理賠師工作具挑戰性,面對離地事件要打醒十分精神。(馬健彰攝)

實錄一、「舢舨充炮艇」 外套品牌標籤被消失

Boris分享棘手個案前,開宗明義指出,「一宗索賠個案有否單據,不會構成公司拒賠理由,更重要視乎個案是否離地。」他隨即拿起一件平平無奇,沒有明顯破爛的灰色外套稱,「當時客人用呢件外套,想向公司索賠12,000元。」

根據Boris所講,客人報稱是件YSL外套,而且是生意合作夥伴贈送,所以沒有單據證明外套價錢。衫上唯一破爛之處,正正是領口位的品牌標籤消失了,「客人就話,外套掛在衣架的時候,招牌意外被大風『扯甩』,所以申請賠償。」

本著懷疑精神,他帶著這件沒有招牌的外套,到YSL專門店求證是否屬於該公司產品。他億述:「當時店員不肯回答,因為承擔責任太大,不敢代表公司。」其後,他帶著這些「黑人問號」,拍下衣服可疑之處的照片,電郵去法國總公司,更得到YSL總設計師回覆,指該件外套並不屬於公司任何一條生產線。最後,他拿著這封電郵與客人對質,雙方最後協議,以3,000元賠償了事,並與客人終止保單,大家不相往來。

一部相機掉在地上,然後自焚,難免令人感到奇怪。(受訪者提供圖片)

實錄二、報稱相機離奇自焚 穿煲後要留案底

不過,幾千元對保險公司只是九牛一毛,公司何苦大費周章?Boris道:「幾十萬賠償好少有古惑嘢,我做嘅嘢唔止係幫公司慳幾千蚊,其實有一重教育意義,話畀班貪小便宜嘅人知,咁做唔係冇損失,而我就整到佢哋有損失。」

Boris隨後分享另一個更離奇案件,「客人在索償表格寫上『數碼相機在家中意外掉在地下,隨即燒著了,完全失控,燒至炭,相機乃多年前購買,已沒有單據,約9,000元港幣』。」他反問道:「呢個事發經過,係唔係匪夷所思?」

由於他覺得太離奇,決定查到底!「呢個客人過往犯案累累,佢當時提交兩張相。我就由呢兩張相開始,搜證程度要篤死佢,等佢冇得翻身!」其後,Boris拜托公司內部其他國家同事幫忙,「荷蘭同事話搵到張相,點知個網站3日後刪除張相。我繼續用鍥而不捨精神,『Key』張圖出來,去Google到搵,點知真係畀我搵到。」

利用網上圖片欺騙保險,已足以控告欺詐罪,所以他將手上證據整理好,轉交給警方。由於證據充足,警方隨即拉人,並落案控告事主欺詐罪。事主最後罪成,要向政府提交行政罪款和向保險公司賠償,並留有案底。「其實我冇幫公司慳到錢,我要請公證行幫忙證明事主提交過一切證據,嗰度都花咗幾千蚊,但我咁做係有一重教育意義,提醒人唔好貪小便宜。」Boris道。

即使有單據,Boris一樣可從中找出奇怪,順滕摸瓜下,藉此找到客人呃保險證據。(受訪者提供圖片)

實錄三、按摩椅突著火    Claim數千元

藝人黃子華在劇集其中一句經典台詞是「若要人不知,唔好太低B。」Boris可能有同樣感受。曾經有客人報稱家中按摩椅突然著火,最後買回一張新的按摩椅,並向公司提交一張4,350元單據,以及已燒毀的按摩椅照片。「你重新購置,保險公司可以照單賠償。不過,呢件事引起我懷疑係,如果你要買張新按摩椅,最少都買張兩萬幾,點會買張4千幾就算?」

之後,他又在Google找到客人所提供的照片,更「好笑」的是,圖片來源根本不是按摩椅,而是一張汽車電動座椅。證據在手下,客人唯有自行取消之後賠償申請,並且自行取消保單。

Boris淡然道出:「我要在大海中找出古惑個案,其實只要客人填索賠表格貼地,唔好天外飛升,畀到足夠資料,一般保險公司都好快賠畀你。因為每單賠償對保險公司都有時間成本,愈快完成對大家都好!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。