老婆1愛好致買唔到樓？人夫大呻：每逢紀念日都要送　網民唔同情

買不到樓到底是人夫賺錢能力不足還是老婆的愛好拖累？有人夫於討論區發文大呻，老婆十分喜愛珠寶首飾及名牌袋，每逢紀念日和過時過節，少不免要送這類禮物，嘆道「每送1次，銀包又肉赤1次」。他指出，老婆經常不滿為何不買樓，他無奈直言「唔使買呢啲畀佢嘅話，可能早就上到車啦」。有網民指出，「所以，有旺夫女，亦有陀衰家」，不過也有人說「老婆你自己揀㗎喎，定婚後先知佢愛買名牌？當然都唔少女人唔愛名牌啦，你無揀到啫」。

該名人夫於香港討論區以「買唔到樓好大原因係因為老婆」為題發文問道，「係唔係所有女人同我老婆都一樣，好鍾意買珠寶首飾、名牌袋？」。他指出，每逢紀念日和過時過節，「走唔甩」一定要送珠寶首飾和名牌袋給老婆，「每送1次，銀包又肉赤1次」。

他說，有時見到老婆全身行頭十分貴氣，「真係驚佢被人打劫又或者佢大頭蝦整唔見，一唔見就幾千蚊幾萬蚊，就咁就冇咗」。他無奈地指，不解老婆平日外出買餸、送小朋友上學放學，都戴上各款珠寶首飾，而且老婆曾試過數次於街外遺失首飾，「有次佢出完街返到屋企先發現自己隻耳環跌咗，咁樣啲錢又唔見咗啦」。

他表示，老婆經常不滿為何不買樓，他道破真相，「咁簡單嘅問題都要問？咪就係因為啲錢用晒買呢啲畀佢囉，佢仲要成日整唔見，唔使買呢啲畀佢嘅話可能早就上到車啦」。

網民留言指出，「惟有盡量找個樸素啲的老婆」、「冇得搞㗎啦，性格問題，出街要落足行頭，你惟有直接同佢講買唔到樓係因為佢使咗你太多錢」、「老公送禮物畀我，基本上都係名牌手袋和首飾，女人就係鍾意靚嘛。不過做老婆都應該睇餸食飯，都係按老公能力去買啦」、「有人話有樓先結婚又有道理，起碼有樓再消費其他奢侈品」、「依家啲樓價咁平，可以買返間」、「你自己縱壞晒有咩好講」。

樓主回覆網民留言說，由於已娶了對方做老婆，所以也只是發文「呻下」，強調不介意送禮物給老婆，「但佢會整唔見嗰下先忟，咁貴都唔好好珍惜」。