【唔編唔聽】《深化危機》搞到Tim搲晒頭 :錄咗3個Key先收貨

撰文:黃浩晉
出版:更新:

《唔編唔聽》Dear Jane來到篇第4集,有主音Tim出場,分享如何處理《深化危機》人聲部份。
日前有表演者以「主音唔使練嘢」為內容作棟篤笑,在網上引起牽然大波。到底主音使唔使練嘢大家心目中數,即刻睇下Tim點樣準備《深化危機》嘅Vocal部份啦!
攝影:梁碧玲

睇完Tim講《深化危機》Vocal如何處理,可以睇番之前三集,Howie、Nice、Jackal講解結他、鼓、Bass喺編曲上面嘅心思:

【唔編唔聽】《深化危機》冇你諗咁易 Howie:簡單又唔悶係最難

【唔編唔聽】《深化危機》令鼓手失業? Nice:唔通坐喺度拍手咩

【唔編唔聽】《深化危機》Bass點先「好Un」? Jackal:要有窿!

主音係有嘢練㗎!

可能有讀者認為主音「冇嘢做」,只需張開口唱歌便可,那你就大錯特錯。

「人聲」同樣是樂器,同樣需要練習才能在揮灑自如,所需時間、心機不會比練習樂器時間少。

Tim直言以往較少機會接觸《深化危機》曲風的作品,而且人聲旋律的Phrasing(樂句劃分)扣緊編曲,與其他樂器的節奏重疊,事前花很多時間才摸索到如何演繹,並且唱得精準。

作為Vocal要練嘅嘢唔會比樂手少㗎!(梁碧玲攝)

Tim舉出《深化危機》Verse的一句作例字,「就當社交/誰甘心/多心/追蹤/足印」,拍子與結他彈奏的樂句一樣;再者,隨着歌曲氣氛推展,歌詞變得密集,呼吸的節奏就變得非常重要。他解釋:「如果你之前嗰句吸啖氣唔足,去到呢個位你一係唔夠氣;一係到下一句『即影即有的/驗證你我那衰退』就會冇氣唱,呢個部份都都用咗啲時間去習慣。(留意歌曲43秒開始)

《深化危機》試足3個Key先錄得好

承上文,Tim表示《深化危機》對Dear Jane以及他來說也是新嘗試,面對新曲風,不能再用以往的方法去處理。他解釋:「今次錄音我會諗埋『到底要攞咩feel呢?』以往錄音我都冇特別花時間去諗,因為夾咗咁多年Band,好自然就唱到,但今次好唔同,到行入錄音室嗰下先發覺有啲嘢要改。」

他續說:「最初入錄音室嗰陣,諗住第1、2個Section(節)就搞掂,但後尾發覺有啲唔啱,反反覆覆去試,直頭錄咗3個Key,先至搵到一個Key可以俾我把聲發揮到最好嘅Tone(音色)。」

原來當初試咗3個Key先有大家聽到嘅《深化危機》。(梁碧玲攝)

要練到入血 做Live先穩陣

Tim分享過,在錄音室花很多時間才能拿捏如何演繹《深化危機》,這些功夫沒有白費,因為這樣唱到「入血」,才能在現場演出發揮自如,他說:「喺錄音室熟習咗呢啲嘢,到Live嘅時候,就算你周圍行,呼吸唔同咗,起碼你潛意識會好自然喺某個位置,準備處理嚟緊幾句冇得唞氣嘅句子。」

要練到入血,先可以確保每次Live都穩定。(梁碧玲攝)