補船行業的黃昏 船排廠東主：時代正淘汰我們
紅色的帆船、放網的漁船，香港曾經是一個以船務聞名的港口，而支撐這些小型船隻開往大海的除了是風和引擎外，還有肩負起修葺工作的船排廠。在船排廠工作了大半輩子的黃賢感嘆，因着種種的原因這行已沒落，而他正守候着船排廠最後的黃昏。
「曾經，長洲等候上排維修嘅船可以多到塞滿成個長洲灣。」
延伸閱讀：【圖輯】沒落的世代 四個人的船排廠
踏上長洲，沿着海傍向北行，再穿過消防局，可以見到一列古舊的工廠，繼續向前行走入排廠街，始發覺看似荒廢的盡頭，仍有幾間船排廠正沸沸揚揚的工作。
朝6夜5的船廠工作日常
這天，錦興船排廠的排上有3艘船，全廠4人正忙個不停，船排廠東主黃賢（牛哥）指揮若定的說：「基本上我哋每日都至少修葺3艘船，如果啲船一朝早6點嚟，晏晝4點幾5點就可以落排。」牛哥口中的「排」其實是一個木製的活動裝置，船排一般是呈長方形，以「井」字形相間的木條堆疊而成，再配以滾輪和纜索等固定，工人可以透過這些裝置把船隻拉上船廠來維修，以及在完成修葺時再放回海中。
「一艘船來到，最先當然是上排，然後我哋會清理船底嘅蠔粟，再髹返底啲油，如果有漏水嘅情況，就會補竹青和灰，完成就可以落排。」牛哥對整個維修的程序瞭如指掌，原來是靠50年的經驗累積而成。
當年只有11歲的牛哥和長洲島上的少年一樣，跑跑跳跳個無停，父親就嚷他到其經營的船排廠學習一門手藝：「以前都係咁，讀唔成書就去做學徒，一係做泥工一係做船。」
選擇在船廠做學徒的他一做就是三年，從「打雜」開始再為船隻髹油，學滿師就會開始學造船：「70年代嗰陣，因為香港仲有好多人會出海打魚，所以都需要好多船，我哋造船都唔洗畫圖則，一條龍骨落去然後就會整到個形出嚟，最後拎去燒同髹油，成個過程大概一個月啦就搞掂。」
木船擠滿長洲灣的70年代
70年代可謂船排廠的光輝歲月，牛哥形容每日都有接不完要維修和造的船：「長洲基本上可以包辦成艘船，我哋整好個模，再去隔離機械廠整引擎，多單到根本做唔完，當時全長洲都要20至30個師傅先應付到。」船排廠一般是處理30至50呎的木船，但有時都有例外：「我就冇話特別鍾意做邊一部分，但我最難忘試過修理一隻100呎、近30幾米嘅大船，相等於依家新渡輪嘅船咁，當時緊張到訓唔着，又驚佢成隻壓落嚟，真係會死人架。」當然，事件最後順利解決，牛哥預想的最壞情況並沒有出現。
不過，隨着製造業北移，內地的原材料價格又較便宜，香港的船排廠開始日漸式微：「香港唔再係以打魚維生，木漁船愈來愈少，大陸製的纖維船愈來愈多，好似鴨脷洲一帶嘅船排廠都已經轉為修理遊艇為主，我哋就仲有啲本島（長洲）漁船同纖維船，依家都冇人入行架喇，最老嘅師傅都成90幾歲，最後生可能係我，但都63歲喇！」牛哥笑言。
失望但不絕望的沒落世代
現時在長洲灣停泊的木船不再如以往的擠擁，漸漸的變得疏落，牛哥語帶失落的說：「其實我哋都算係香港情懷丫，但都無辦法，我哋過得一日得一日啦。」或許這份情懷終有一日消逝，牛哥最後都積極的道：「只要一日仲有船要整，我哋都會喺度，不過如果我唔喺度又無人繼承咁就難講了，哈哈。」
