讓我們助ThisAV追上Pornhub，點亮香港嘅未來

小故事一個：1990年，有位血氣方剛嘅少年，好開心卒之等到其他屋企人去幾日旅行。
少年並冇叫女朋友上嚟啪啪啪，因為佢冇女朋友。不過佢擁有更美好嘅嘢：老豆嘅珍藏北歐AV錄影帶。
少年唔止睇一次，直頭睇到識背對白（北歐片都講英文，OK？），因為唔知孤寒定專一嘅老豆咁多年都唔買新帶。但唔使驚屋企人忽然返嚟，可以全無壓力下咁睇，少年還是感到很爽。

然後你估到了，Murphy's Law，食帶。少年同陳易希一樣住屯門，但畢竟冇嗰種拆爛嘢嘅發明家天份。少年拆開部錄影機，研究咗幾日，最後當然係越搞越衰。後來全家返嚟，紙包不住火，少年話落去食嘢奪門而出。到佢食完一件餐蛋治返屋企，錄影機已修好。打後咁多年冇人再提過部錄影機，直到今日。

對，個少年當然就係我。事隔差不多三十年，科技日新月異，求其一部舊款智能電話都勁過當年成個太空總署嘅電腦。唔怕人鬧嘅，而家睇AV，開住會睇又得，食住飯睇亦得，絶對自己話晒事。想停就停，唔怕食帶。

在香港，就勝在有thisav （而唔係ICAC）。諗下有乜土產科網可以揚威海外？ 除咗9gag，openrice（都窄窄地），以及141外，就係thisav。Thisav係中文網站，但主要流量反而嚟自日本，日本人都要「禮失求諸野」，去香港網站睇返日本AV，值得香港人自豪。蔡東豪有一排成日講「溫布頓效應」，thisav係完美示範——香港基本上不產AV， 但有最強嘅AV網。 

Thisav幕後搞手神秘，但靈魂人物係個土生土長嘅香港80後。而聽聞佢係唔多睇AV嘅，正如毒販嘅仔女當然唔吸毒，Steve Jobs嘅小朋友亦都唔用iPad。

冇上過thisav嘅純情網友，咁我解你知，「即係好似Pornhub咁咯」，明冇？講白啲，就係同Web2.0對應嘅Porn2.0。用家產生內容，網站只係提供平台，你放珍藏北歐片上去懷念老豆又得，你去北歐自拍亦得。

小弟想寫呢個課題好耐，但觸發點就係早幾日起身，打開YouTube，自動推薦我睇德國對英格蘭足球友賽精華，很好，估到我想點。然後到我睇thisav （一起身唔可以睇的嗎？），見到基片廣告。搞乜？ 

以下想講嘅，係如何令thisav做得更好。我以龍頭Pornhub為鑑，對，香港人梗要Dream Big。一定要講清楚，以下只係提議，真心想make thisav a better place，絶非「批評」。畢竟我一個仙都冇比，有乜資格批評？而我睇完「澳門首家線上賭場上線啦」嘅廣告亦冇去幫襯。

1. AV正名行動

首先，潮流興大數據，大家產生數據，先由高登發起嘅「AV正名行動」開始。 建設網站靠大家，薯片話齋，信一個人，不如信每一個人——咁你班仆街就係信唔過嘛！Thisav上面嘅片，雜亂無章，有時睇完成套都唔知邊個主角，覺得好睇想搵「延伸閱讀」都唔易。就因為上載嘅人亂咁嚟，冇話跟返片名編號主角名字等等格式。有時只上載編號都還好，有心唔難搵到其他資料。最大劑係有啲只係叫「極品學生妹」「新人」，甚至係啲完全唔明白咩意思嘅中文字，點搞？高登仔提議用寫論文嘅APA格式，但講到尾，都係要大家自律，否則一切免談。Pornhub用家在呢方面的確做得比較好。

2. 做好排行榜

有晒數據，就萬事好辦。之後當然係各式嘅排行榜、分類。而家thisav唔係冇，但做得唔好。我上次為寫《捷克AV點解有量又有質》篇文就上Pornhub搵資料，人地唔止列出唔同主角嘅作品，甚至每個國家邊個最熱門都話你知。我估你都想知韓國人睇乜吧？（可能係睇葉子楣，隔離飯香嘛）

3. 個人化推介

唔好向直男推介基片，正如唔好向基男推介直片。Pornhub直頭有應用算法（algorithm，geek男聽到呢個字已經興奮）嘅 Porn IQ，為你度身訂造今次睇乜好。基於乜？ 可能係你本身設定 （例如本人唔鍾意鬼妹），可能係時間 （半夜睇啲靜啲嘅唔好擾人清夢？），地點（入鄉隨俗，去韓國就睇韓國片？），甚至基於你睇咗幾耐 （睇得太耐嘅就比啲重口味嘅你先滿足到）——一切都係算法，you name it。 

4. 舉辦大感謝祭

2015年，丹麥有位少年好似我當年咁，睇緊Pornhub但阿媽走上嚟又熄唔到機，唯有整爛部手提電腦。不過佢比我好彩，Pornhub知道呢件事後，為咗表揚呢個忠實粉絲，就送過部新嘅電腦畀佢——不過上面全部係Pornhub嘅logo。有理由相信係自編自導自演嘅行銷手法，但我聽到呢個故事還是覺得好感動，想起當年有幾個俄超辛尼特（FC Zenit Saint Petersburg）球迷，由聖彼德堡開咗15000公里車去海參崴作客，點知架車跪低咗，辛尼特送過架新車畀佢地，一樣一時佳話。

5. 做善事

睇片以外又點？其實AV網站有千千萬萬嘅可能性，遠超你想像。Thisav都做咗唔少，一向都在社會同政治上企到好前， 馬尼拉人質事件佢會致哀同叫你捐錢， 學民反國教佢停站一天聲援學生，港大校委會議錄音都有人放上去（因為有禁制令）。但，其實可以做嘅，仲有好多。

PornHub在紐約搞過Boob Bus幫乳癌基金籌款，仲幫人免費驗乳，怕醜嘅亦教你返屋企自己驗。之後再搞咗個Save the Boobs嘅活動，只要你睇「巨乳」或「貧乳」嘅片就幫你捐錢。男女平等？之後有個活動，睇「巨鵰」都幫你捐錢，不過係植樹日幫你種棵樹。香港大可以搞個「植樹姆指」日。

6. 自己出品

除此以外，Pornhub仲走出2.0，自己拍埋戲，好似Netflix咁。佢想拍一套Sex in the space，聽名都知科幻。在香港大約會變成Sex in HKU Space。哪有錢？薯片都識搞眾籌啦！應該好過夾錢買咖啡機。

唔自己拍，同人一齊拍又得。個個話支持港片嘛，咁但香港人身驕肉又貴，唔通下海打真軍咩。唔緊要，冇話一定要拍AV。2013嘅《性人君子》（Don Jon），一線型男索女Joseph Gordon-Levitt 同Scarlett Johansson主演，在IFC上，絶對登大雅之堂，套戲嘅監製就搵咗Pornhub合作，男主角日睇夜睇。港產片絶對可以同thisav合作，好過豪情3D睇杜汶澤。

7. 出埋配件

要講落去，仲有好多。Pornhub甚至有出360度嘅影片，將VR（虛擬現實）技術用得淋灕盡致，仲出埋可穿戴裝置（Wearables）——其實係一條手帶，畀你邊睇AV邊發電。點發電？都話手帶咯……

文首講過睇完套戲都唔知邊個主演十分冇癮。會唔會好快用面部（或其他部位）辦識可以認到AV演員？咁就唔使大家次次人手輸入。睇戲唔知演員講乜對白又係冇癮。會唔會其實好快用聲音辦識都認到？反正AV對白唔多，嚟嚟去去都係嗰幾句，而觀眾唔會介意你譯錯。

作為中文AV網站，thisav 已經落後Pornhub不少。實在唔容許我地再休養生息hea足多五年。眾籌好，義工好，辦法總比困難多。正所謂憑一口氣，點一盞燈；念念不忘，必有迴響。靠住呢啲慾火，呀，係燈火。我相信我哋必定可以點亮香港嘅未來。

（文章純屬作者意見，不代表香港01立場。）