【大埔公路翻九巴】動彈不得睹血人垂死求救　七旬生還者夜夜垂淚

一羣馬迷，於上月10日(周六)，趁送歲賽馬日往沙田馬場試試運氣，賽事完結後，馬迷歸心似箭，擠上巴士返回大埔，豈料卻搭上亡命旅途，19名乘客因車禍枉送性命，從此與家人陰陽永訣。逃出煉獄的生還者亦不好過，車禍轉瞬已發生一個月，他們身體上的傷仍不時痛入心扉，72歲的生還者陳伯午夜夢迴，腦海仍浮現血淋淋的乘客向他揮手求救一幕，「滿身鮮血，伸隻手好似招魂咁」，這恐怖、無助的場面，令他每夜流淚。

「食止痛藥食到胃穿」

「我依家心情都仲未平復到，啲影像都成日浮現出嚟。」居於大埔的72歲生還者陳先生，過年前已出院休養，他現時頸部仍然疼痛，「食啲止痛藥，食到個口都寡晒，食到個胃都穿！」陳先生指，當時他坐在巴士上層中間位置，事發後曾當場暈倒，隔一段時間才甦醒過來，自行爬出已變成廢鐵的車廂。他憶述：「我爬出去，但條頸好痛，爬唔到遠，坐喺度都痛，最尾都要瞓返低」因他已是泥菩薩過江──自身難保，只能眼白白，望着他身旁，被巴士車身壓着，奄奄一息的乘客。

講唔到形容詞　車禍觸目驚心　慘狀如電影般

侊如置身戰場　血肉屍體歷歷在目

「佢哋係被碌親，有啲只見到個頭，有啲得返隻手凸出嚟，啲人啲血，流到好似畀人淋咗紅油咁，個心情依家都平復唔到。」陳先生侊如置身戰場般，只會被眼前的情景嚇怕、嚇呆，「係已經六神無主」。他目睹有乘客痛苦地伸手求救，「個巴士砸住咗佢下身，個上身突咗出嚟，滿身鮮血，伸隻手好似招魂咁，翕你埋嚟救佢，但啲人都唔夠膽行過去。」

「痛到已經都出唔得聲，唔係一個喎，係五、六個！有啲畀巴士砸住個頭，嗰啲慘法，係點用形容詞都講唔到出嚟。」陳先生萬料不到，上一秒，他們仍為心怡的駿馬歡呼吶喊。但下一秒，卻是經歷生死的考驗，無法逃避地望見這觸目驚心的悲壯一幕。

常憶車禍情景　「瞓到半夜會流眼淚」

陳先生直言，現時只要「瞇埋眼」，現場的慘狀即如同電影般，在腦海中放映。「夜晚黑，瞓到半夜，自己係會流眼淚；如果擘大眼，個眼係會眼濕濕㗎喎。」雖然車禍已發生一個月，但死傷者的慘況卻仍然歷歷在目，「見到個情景，你拍電影做導演，你點諗都諗唔到啲人會變成咁，成個喺你眼前，點樣恐怖你都諗唔到！」

公園撞見傷者　半邊面未消腫變黑

頸痛致身體不靈光　遂減少外出

人生好比一場賭博，無法掌握，但仍要繼續前行。陳生先因頸痛，轉身及搖頭都不靈光，為免被單車撞傷，他不敢貿然行出街。但為了舒展筋骨，他間中仍會冒險行落大元邨中央公園。

邨內巧遇車禍傷者　斷手斷脛骨　臉頰仍未消腫

「醫生唔係萬能架，有時都係要靠自己。」有一天，他在邨內公園撞見一名同車的傷者，「佢斷咗右手，斷脛骨，半邊面黑晒，依家都成個月啦，都未消腫，成個人落晒形，我睇落去，佢仲慘過我。」

睹心驚肉顫場面　醫護人員侊如置身戰場

陳先生是最後一批獲送院的傷者，並親睹一幕幕令人心驚肉顫的場面，「後期記者嚟，傷者已經走咗一大截。如果見到第一批傷者，你睇到個場面仲恐怖！」

陳先生形容現場如同戰場般，「幾十個包晒頭，流晒血，坐喺地下；救護員嚟到一落車，就即刻為傷者包紮，一包完就上車走，那打素爆棚就去第二間！相當爽快。」

感謝消防救護員　落力拯救生命

經歷生與死，陳先生感慨萬千，「都係食得就食，行得到就要周圍行，等到日日要坐喺屋企，好似廢人咁，就真係慘。」他亦想透過香港01的報道，向當時到場施援的消防及救護員致謝，「佢哋好快手，真係好落力，好想同佢哋講聲『多謝』。」