【遺物轉化・生前】病重媽媽預留母愛 衣服做攬枕 寫家書伴成長
死亡雖沉重，但生命卻因死亡才變得有意義，假如死亡有預告，又是否能更易接受？資深護師多年來在醫院看盡生死，入行原因竟與一名在死前拍下錄像的牧師有關；一名年輕父親突然患癌，擔心太太及兩名年幼兒子難以接受，死前半年已接受哀傷輔導，亦有母親在死前親手製作書本，留下未能及時說出的話，讓兒子每年生日時能閱讀到亡母的愛，讓小朋友早日明瞭生命課題。
牧師一句話 讓她看透生死
醫院內每日見證著無數的小生命來臨，也盡是離別故事的地方，葛量洪醫院資深護師趙可欣（Wendy）十多年來看透生死，談到入行經過，基督徒的她憶起一名對她影響深遠的牧師，「當時啱啱中七畢業，打算跟呢位牧師一樣加入神學院，但牧師話我太年輕，好難牧養一啲年紀大嘅人，就建議我去做護士，因為可以睇到好多生死，更快成熟」。
有計劃面對死亡 整個家庭將很不一樣
Wendy遂攻讀三年的護士課程，至畢業時，這位年僅33歲的牧師竟患癌離世，遺下太太及一對只有一歲及四歲的孩子，「當佢知道自己有cancer開始，就不斷錄下影帶，佢知道癌症病人去到末期時會有好多掙扎，例如害怕、信仰動搖等」，故他拍下多段影帶，向世人展示由患癌至離世的心理變化。牧師以生命影響生命，令Wendy明白原來當一個人有計劃地面對死亡，整個家庭將很不一樣。
牧師「死亡預告」 感動護士陪病人走最後一程
孩童天真，不懂死亡為何物，英年早逝的父親，卻已為稚子留下一份生命禮物。「4歲仔睇完錄像後，會明白自己點解冇咗爸爸，知道爸爸嘅信念，牧師錄低呢餅帶，係想令仔仔知道佢係有根」，Wendy表示，牧師的舉動令她大開眼界，立心要陪伴病人走最後一段路。
騙小孩亡者「去旅行」有反效果
法拉醫治中心策略發展總監鄭玉儀（Joan）強調，哀傷輔導並非只在死後進行，「曾經有位30幾歲嘅爸爸患Cancer，我哋幫佢兩位小朋友同太太喺佢離世前半年開始準備」。Joan指，部分家庭面對有親友死亡時，僅向小孩表示死者「病咗」或者「去咗好遠嘅地方旅行」，實屬不智之舉，「要畀小朋友好認真地知道死亡係咩一回事，唔係食藥打針就會好，如果唔係佢第時會驚咗病，以為一病就會死、以後會驚去旅行，以為啲人去旅行即係以後都唔番嚟」。
媽媽面對共同生活的伴侶即將離世，卻又需獨力照顧年僅三歲及六歲的孩子，把失落之感藏於心底，「我哋鼓勵佢入輔導房時將情緒宣洩出嚟，要喊就喊，亦畀佢將啲憤怒講出嚟，因為伴侶早逝，遺屬容易諗點解上天要拎走佢」，Joan指，需不斷提醒媽媽應正視自己的哀傷，與孩子一起處理情緒，「可以話畀小朋友知，自己都好掛住爸爸」。
重病媽媽用衫做攬枕 書寫給孩子的信
一名患上重病的媽媽，只剩下半年性命，留下一名只有約4歲的小孩，「呢個年紀嘅小朋友，最需要陪伴同擁抱，嗰位媽媽知道，小朋友每日都要攬住佢、聞吓佢，於是我哋幫佢造了一個攬枕，套上媽媽嘅衫，喺媽媽離開嘅初段，小朋友就可以攬住」。母親即將與愛子離別，有著切膚之痛，該名母親也親手製成一本書，書中留下她對兒子未能親口說的話，「小朋友每年生日，就可以睇吓媽媽留低嘅訊息」。
資深護師主動提財產分配 讓亡者沒遺憾
葛量洪醫院的紓緩醫學部亦有提供哀傷輔導服務，資深護師Wendy提醒，預期中的哀傷應及早正視。她舉例指，部分年輕人患上重病，整個家庭均需要準備哀傷期，「除咗要向小朋友講解死亡係咩，有啲事主嘅父母要白頭人送黑頭人，會好難接受，甚至想跟埋個仔一齊走，都需要專業人士同佢哋傾吓」。
Wendy又指，除心理輔導外，輔導員亦會向家庭成員提出一些現實問題，「例如講財產分配，病人通常集中喺治療上，一講錢就會諗，係咪我就嚟死，你哋就謀住我副身家？」Wendy指，及早安排財產分配，對家人來說是一種保障，由第三方提出這些問題，家庭成員及病人也會較易接受。
