【挑戰海關】海關查藥房 霸道職員:同我出去 關員:咪搞我同事

撰文:
最後更新日期:

海關執法「舌戰」藥房惡職員!周四(17日)晚互聯網瘋傳數段短片,多名海關人員於上水某藥房行動期間,疑因「趕客」惹起職員不滿,其中一名黑衫惡漢「兇」關員稱:「大晒呀?你唔好喺度阿趦阿趄(阿之阿左)呀!」雙方更一度推撞,氣氛緊張。事件引發熱議,網民相信行動與昨日海關掃蕩冒牌保健沖劑有關,懷疑藥房職員心中有鬼,「唔係大晒,但執緊法就大過你!」

走啦走啦走啦,冇生意呀。
海關關員
咩冇生意呀?你同我行出去呀!咩事呀𠵱家!
藥房職員

一名黑衫男職員一度與海關人員推撞。(互聯網影片截圖)

惡職員:咩冇生意呀?你同我行出去呀!

涉事數段短片均只有10餘秒,昨晚開始於各大facebook群組瘋傳。片中可見一名相信是海關人員的男子,於藥房門口驅趕客人稱:「走啦走啦走啦,冇生意呀。」一名黑衫黑褲男職員即時召喚顧客,並一手將關員推出店外,怒稱:「過嚟過嚟,咩冇生意呀?你同我行出去呀!咩事呀𠵱家!」即使關員表露身份他亦置之不理,「海關又點呀?又如何呀?大晒呀?你唔好喺度阿趦阿趄(阿之阿左)呀!」

關員喝令返入去 惡職員反駁:唔行呀,吹呀!

另一片段已可見有警員及其他關員在場交涉,並在場圍起封鎖線。另一名職員亦指手劃腳向關員對質:「你有冇郁過手呀?」當時有一名紅衫男子在旁勸阻。疑似較高級的關員,向「兇」人的黑衫漢說:「你行返入去呀同我!」黑衣職員反擊:「唔行呀,吹呀!」疑似關員說:「唔行你唔好搞我啲同事!」

該名黑衫漢其後亦「兇」另一名關員。(互聯網影片截圖)

網民憂心 要求嚴厲執法

片段引發網民激烈討論,有人認出涉事地點為上水一間藥房,並相信行動與昨日海關掃蕩冒牌保健沖劑有關。不少人擔心有關行為會影響治安,並懷疑藥房作賊心虛,「肯定有問題」、「唔係大晒,但執緊法就大過你!」、「要求嚴厲執法,拘捕呢個傷害公職人員嘅藥房仔!」但亦有人認為海關人員用詞不當才成事件導火線,「人哋打開門做生意,趕客都算,仲要大大聲講冇生意。」

阻撓海關屬犯罪 可處罰款$5,000及監禁6個月

海關根據線報於昨日(17日)搜查旺角、屯門、大埔及上水等7間零售店舖,檢獲350件、值約2.5萬元懷疑冒牌保健沖劑,拘捕11名男女,當中包括3名負責人。根據《香港海關條例》列明何人如對為執行職責而行事的海關人員,故意予以襲擊、抗拒或阻撓,即屬犯罪。可處罰款$5,000及監禁6個月。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。