網購攻略

【聖誕禮物2019】尖叫度爆錶! 多款好玩創意小禮物收服百厭小朋友

撰文:莉莉安
出版:更新:

「又到聖誕,又到聖誕!」聖誕節唔單止係大人們狂歡嘅節日,亦係小朋友係繼生日之後最期待嘅日子之一,除咗有假放、有得同同學仔開大食會,玩抽獎,仲可以攞正牌收禮物!不過對有家室嘅大人們嚟講,聖誕分分鐘仲忙過平時,事關呢頭要帶小朋友出去玩,嗰頭又要預備聖誕聯歡會小食,仲未計小朋友最期待環節——禮物時間!各位爸爸媽媽、叔叔姨姨,你地準備好化身聖誕老人未?如果仲未物色禮物,就快啲參考以下嘅禮物清單,抓緊時間為小朋友準備驚喜!

無論咩年紀嘅小朋友,對聖誕都總係充滿美好嘅幻想,雖然有唔少家長會帶埋小朋友親自去揀禮物,不過禮物當然係越神秘先越有驚喜,而拆禮物環節更加係維繫親子感情嘅好時機。

如果家長們今年都打算搞一個大小同樂嘅聖誕派對,以下多款禮物必定可以為派對增添歡樂嘅氣氛,仲可以令百厭嘅小朋友坐定定𠻹!

🔻1-3 歲小朋友之選🔻

TAKARA TOMY 迷你迪士尼糖果球夾夾機 HK$468.52

識得郁,又會發聲嘅玩具對1-3歲嘅小朋友就最有吸引力。呢部迷你夾公仔機用咗小朋友最愛嘅迪士尼人物做主角,可愛嘅公仔唔止俘虜到小朋友,就連身為大人嘅小編都覺得非常可愛!機內有發聲裝置,內置2首歌曲、5種音效,48種英日語指示音,小朋友玩得開心嘅同時,亦都可以學埋英文,以及訓練手眼協調能力

木製煮麵仔套裝  HK$408.46

煮飯仔幾乎係不分年代國籍,任何小朋友都必定愛玩嘅玩具之一,但係未必個個家庭都有足夠嘅預算同空間買一套「架餐」齊全嘅廚房,如果煮唔到飯仔,煮麵仔都差唔多啫!小朋友可以自由組合套裝入面唔同嘅木製食材小部件發揮小小創意,砌出一碗特製嘅湯麵!

🔻3-6 歲小朋友之選🔻

寵物小精靈生態球 HK$80.39

雖然寵物小精靈已經係上一個年代嘅產物,但當見到一班Pokemon喺精靈球內擺出又可愛又梳乎嘅造型,試問又有邊個小朋友抗拒得到!每個精靈球入面都有獨特而又符合番Pokemon屬性嘅生態環境,例如奇異種子就喺草地、車里龜就喺小水池、卡拉卡拉就喺沙地上,除咗夠晒可愛,小朋友收到之後仲可以動動手自己組合,有得睇又有得玩!

🔻6-9 歲小朋友之選🔻

對於6-9 歲嘅小朋友,毛公仔呢類玩意相信都已經滿足唔到佢地,呢個時候就適合送番啲娛樂性高,比較複雜嘅小玩具就啱喇,例如LEGO就係一個好選擇喇!事關LEGO可以畀小朋友挑戰一下自己嘅能力,學下點樣跟住說明書,由零開始建立一樣場景,動手之餘又可以動動腦筋!如果有兄弟姊妹嘅,仲可以等佢地分工合作培養感情,最重要係LEGO一玩就玩成晚,簡單一招就已經令到又嘈又百厭小朋友靜落嚟!

LEGO Super Heroes: Iron Man Hall of Armour £49.99

MARVEL唔止大人鍾意睇,當中有唔少角色更加係好多小朋友嘅偶像!呢套IRON MAN LEGO有齊晒6款唔同型號嘅IRON MAN,望見佢地齊齊整整咁放喺自己親手砌出嚟嘅展示台上面就覺得開心!

LEGO Friends: Olivia's Cupcake Café £24.99

LEGO並唔係男仔嘅專利,事關好多女仔都好鍾意玩佈置遊戲,LEGO 就可以畀佢地一邊砌屋仔一邊將間屋佈置到靚一靚。加上LEGO Friends呢個系列係以5個性格形象都唔同嘅小女孩做主角,女孩子們轉眼間就會將自己投入角色之中,發揮小創意,創作出一個個大故事!

🔻9歲以上小朋友之選🔻

9歲以上嘅小朋友已經係大細路,唔止喺心態上慢慢長大,亦都會開始會有自己嘅小世界,呢個時候與其買啲小朋友玩多一兩年就唔想玩嘅卡通玩具,倒不如揀啲適合一大班人一齊玩嘅小遊戲,等佢地可以約埋班同學仔開心咁玩番日。而講到團隊遊戲,首選就一定係非board game莫屬,平日玩又得,喺派對上即拆即玩都得!

哈利波特棋盤遊戲 £27.99 

無論係大人定小朋友,只要自問係哈利波特嘅粉絲,一定可以秒殺呢個遊戲,皆因遊戲將棋盤同問答結合起嚟,只要答啱問題,再加上少少運氣,就可以成為贏家!

木製Gigamic Katamino拼圖遊戲 HK$467.94

玩法多變嘅遊戲就最啱好奇心重,鍾意新鮮感嘅小朋友。Gigamic Katamino 嘅玩法類似七巧板,小朋友要利用唔同形狀嘅積木,喺有限嘅空間內嚟砌出遊戲卡上指示嘅圖形,或者進行對戰解謎,唔好以為好似好簡單,大人都隨時會被難度!

(產品資料以官方最新發佈為準)

唔想錯過任何網購限時優惠?立即 Like 《一網打盡》Facebook專頁同加入Telegram Group啦!你仲可以拎到獨家優惠碼及禮品𠻹!

👉按此讚好《一網打盡》Facebook專頁👈

👉按此進入Telegram優惠碼發放區👈