【分手博物館】放棄真心好男人 「終身」該交託給情感還是現實?

撰文:
最後更新日期:

分手後,昔日的信物應該如何處理?紀念品還在,紀念的人卻已離開,同一件信物,不只蘊含著甜蜜回憶,還夾雜點點沒能開花結果的苦澀......《香港01》網上「分手博物館」,讓你放下「愛情遺物」,放下遺憾。

青梅竹馬的戀愛,永遠最純真。然後,我們成長,漸漸被蘸上不同的色彩。兩個人,漸行漸遠。有人努力堅守,沒忘初衷;有人發現更合適的路,不再磋跎。

一段關係,該忠於情感還是妥協於現實?人長大了,便可能發現,沒有標準答案。

成篇文我流住眼淚打完,可能好多人覺得,我係不負責任,因愧疚而寫。但感情嘅事,真係唔係一筆一劃可以描述得細緻完美。
CN(讀者)

他買的Tiffany對戒。曾經以為一起戴上了,就是心連心。(讀者提供圖片)

F先生和我相識於預科求學時期,當時因爲大家都未夠入學分數而周圍撲低門檻學校而認識,成了同學。那時全班同學都來自五湖四海,都覺得特別投緣。F先生被推薦為班會會長,佢熱心投入令我覺得份外吸引,無耐就一齊咗。我們一齊返學、食晏、放學,放假又行街,同一般情侶無分別。我們住嘅地方相隔好遠,一個東涌一個堅尼地城,但F先生都風雨不改每日管接管送......

兩年後,大家都考唔到入大學,就開始投身社會大學,無諗過竟然係,我哋呢對人哋眼中嘅模範情侶,最後卻係由我出手了斷。

(vcg)

記得大概喺分手前四年,我哋仍然過得好甜蜜,會慶祝生日、紀念日,行山、旅行,只要我想去做嘅事佢都通通陪我去做。有佢嘅日子,我覺得人生好安全,好感恩。亦喺呢四年時間入面,大家開始接觸雙方屋企人、朋友,令身邊人都覺得我哋實在「打風都打唔甩」,甚至大家都認定會係終身伴侶。F先生媽媽經常會為我煮好餸煲好湯,亦會送禮物畀我,我媽媽亦都好關照佢,感覺已經係一家人。

那時初出社會工作,依然有好多期盼同幻想,好記得嗰陣剛出咗模擬市民3D版嘅電腦遊戲,愛不釋手嘅我哋更加會模擬自己嘅人生,甚至將入面嘅嬰兒當做自己嘅將來嘅愛情結晶,幫佢哋改好名。

的確,現實環境會扭轉人嘅想法或者固有思想。出咗嚟做嘢,接觸好多「估佢唔到」嘅人和事,同以前幻想嘅,係徹底唔同嘅兩回事,原來生活真係好物質化,係要用勞力同錢去滿足。我同F先生從來都無計劃一齊去儲錢或者計劃結婚,感覺似係大家甜蜜安穩,所有嘢就會順其自然而來。

我提及結婚,換嚟係Tiffany對戒。雖然無一個承諾,但我哋每日戴住,就好似安慰緊自己,只要大家個心連住,就唔會有其他意外同問題。

(vcg)

到我返咗兩三年工,工作不如意同壓力令到人好負面,同F先生呻嘅時候,卻每每只係得到「加油啦,打工係咁架啦!唔好理人哋囉」之類。作為一個女仔,係比較需要更多嘅同理心。之後我轉咗份新工,同事普遍年齡平均都比自己大五歲,自己嘅工作能力、應對同心理都更加需要轉變,喺個段時間,我覺得自己愈嚟愈獨立,獨立到我已經唔再係好需要依賴F先生。

聲調唔再嗲,貌合神離......但F先生依然堅持努力不懈對我好,好到我到今時今刻都覺得呢一世都唔會再搵到好似佢咁好嘅男人。

2014年7月,佢最後一次送我去機場,那次旅行之後,我就無再搵過佢了。

(vcg)

一年後我識到依家嘅未婚夫,而佢,我知道係一直醉心於工作同遊歷世界,單身。

同佢六年嘅感情,我只可以用遺憾同內疚做總結。有好多人會責怪我:有咁好咁值得交付終身嘅人唔識得去珍惜。但我都無辦法解釋「感情」呢兩隻字,遺憾無辦法開花結果,內疚自責於我好似辜負咗屋企人、朋友或者F先生對我哋呢段關係嘅期望。

我都好想講,就算到呢一刻,佢喺我心目中依然佔有好重要嘅位置,我都有猶豫過係咪做錯過決定,終身關係應該交託於情感定現實?我都未必可以好好判定。分手後,我哋再無搵過對方,因為好驚,想迴避,唔敢去接觸。

我真係好想透過呢度衷心對你講聲對不起!

嗰六年係我人生無比快樂嘅時光,你係我人生中最大嘅太陽花,我知道大家心目中都有大家一個位置,希望你會永遠幸福快樂。

呢六年,我係最錯嘅時間遇到你.......

***

你也希望在我們的「博物館」展示你那段情的「遺物」和關於它的故事,藉此放下昔日的遺憾嗎?請把「愛情遺物」的圖片及聯絡方法傳至hk01(請註明《分手博物館》)。

請進入《香港01》「分手博物館」

《女生》總在你身邊,請立即下載《香港01》App



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。