打工仔7大委屈實錄 職場獵頭人親授化解之道

撰文:
最後更新日期:

天下間哪有不受氣嘅工?你以為啞忍一下,退一步就可以海闊天空?其實錯哂,最終隨時被踏上心口,一腳兜走,到時就真係喊都無謂。(潘思穎攝)

職場老鬼教落,「受人二分四」,工作受氣在所難免,人工包埋。不少打工仔為了生活,寧願忍一時風平浪靜,但當你受盡百般委屈時,又會否忍無可忍?

近日有人力顧問公司及求職網做了一項名為「帶着委屈去返工」的調查,發現大部分打工仔都為待遇、人事及上司問題而感到困擾,部分個案離奇得來卻有血有肉。各位上班族,內裏可有你的身影?

8成人有「待遇委屈」

熱情不可當飯食,不論你對工作有heart定無heart,最終有多少人工落袋才是一眾打工仔的重中之重。上述調查結果發現,超過8成受訪的打工仔認為曾經在待遇問題上受過不公平對待。而緊隨其後的,則大多與人際關係有關,受到同事或下屬、上司及客人的委屈,分別排第2、第3及第5位。

老細衰、份糧衰、同事衰、個客又衰、打工永無出頭天……委屈多多,心有不甘?職場獵頭人、人稱辣媽Son姐的張慧敏就認為,谷氣的打工仔此時不宜飲用「心靈雞湯」,倒是該多練練5式心法,強健體魄抗委屈!

第一式、比較無益    切忌Hea做

待遇委屈︰「為共渡時艱,將我哋啲老臣子降職及大幅減薪,公司仲理直氣壯話『人工高過啲新入職的𡃁妺已算不錯。』 咁『狗 』嘅說話都講得出!」

Son姐教路,與其花時間跟同事比較人工,不如積極磨利自己加強叫價能力。(受訪者提供)

職場千古難題——人工多少才算合理?跟市價?供求關係? Come on James,實情是人人都在貨比三家,Ivy跟Burton比、Burton又跟新來的Matthew比、《蘋果日報》跟《香港01》比……

有比較才有進步,但過份比較以致心有戚戚然,Son姐就認為頗為無謂。「你硬要將一己主觀願望當成人工標準,註定無好結果。好多人鍾意將上年人工幾多、或者新入職同事人工當作參考,但邊個話人工係咁定?」

她續稱,覺得待遇問題上受盡委屈的打工仔,其實浪費了太多時間在別人身上。「道理好簡單——你無料,憑什麼叫老闆加人工?如果佢係一個賤老闆,你表現再好亦無法說服他!你只有兩件事可以控制,自己的表現以及幾時轉工,但『hea做』就一定無運行!」

第二式、劃清界線    勿做同事奴隸

受同事委屈︰「明知聽日單嘢有『鑊氣』,個 Partner 竟然臨時『射波』,跣到我『攤攤腰』。」

「我無時間同佢哋(同事)social。」出爐傑青黃仰芳言論極具爭議性,但打工的不妨撫心自問,是否也有過當同事是朋友,結果疲於奔命?(資料圖片)

出爐傑青曾有言道,她從不會跟同事「去hea去吹水,我無時間同佢哋social。」孰是孰非,一言難盡,但Son姐就希望各位多多思考兩者界線。稍一不慎,隨時為了面子,受盡委屈,最終輸掉工作。

「其實人人都會犯這個錯,包括我自己在內。這些年來聽得最多的,是好多人恃住『Friend底』,任何事都找你幫忙。到你想『揸正』來做,佢又話你扮大牌。」

難道同事真的不可成為朋友?Son姐連忙更正,「同事當然可以成為好朋友,但工作時大家最好有共識,要公私分明。你濫做好人,下下幫人頂,到你頂唔順成為負擔,邊個幫你『埋單』?千萬不要模糊職責界線!」

第三式、良禽擇木而棲

受上司委屈︰「上司叫我返去開他房的燈,等佢可以扮有返工。」

老闆作為打工仔頭號委屈根源,箇中結構性矛盾實屬無解。道理簡單——老細政策,即是公司政策;一係跟,一係唔跟,不三不四恐怕只會落得精神分裂收場。Son姐亦坦言問題「棘手」,唯有事前做足功課,盡量揀個好老闆。

「你選擇得份工,想留低,就麻煩你花點時間了解老闆想點,當有問題的時候就應該說個清楚,而不是做了幾年才埋怨。」

(記者︰但老闆想法成日變,好大壓力喎!)

「變都好正常,世界都日日變。回歸基本,你要留低,就要適應。工作是為了老闆服務,而不是要求老闆來迎合你。其實我都唔明,因為Boss而覺得委屈的,咪轉工揀一個適合你嘅老闆囉,你有得揀㗎!除非你好需要錢,否則點解要矮化自己委曲求存?」

第四式︰懷才不遇還是才能錯配?

懷才不遇委屈︰「睇年資決定升職。明明自己做得嘢,但都係升啲老鬼。」

Son姐聽後劈頭便是一句,「邊有咁多懷才不遇呀,怨婦就多!」

根據多年獵頭經驗,Son姐發現職場上才華十足卻慘遭埋沒的人根本少之又少,更多的其實是才能錯配的人。

「現今商業社會競爭咁大,真正有才華的人其實好難被埋沒,覺得被埋沒、自覺委屈之前,你最好撫心自問一下——你的才能是此處需要的嗎?譬如你身處報館之中,寫得一手好字、執字粒好快都難以成為升職理由。相比起業界菁英,你的位置在哪裏?」
 

第五式︰正規途徑秒殺客人無理要求

受客人的委屈︰「明明係個客同公司有誤會,自己被迫硬食死貓及向客人賠不是,仲要斟茶,同個客認錯,以保持同個客人的長久友好關係。」

對於從事服務行業的打工仔,「湊客」有時仲慘過「湊仔」,要求多多不緊要,最弊的莫過於無理取鬧,動軏就要投訴,怨氣積累無可避免。(李澤彤攝)

一句「顧客永遠是對的」口號,簡直害慘了千千萬萬現職服務性行業的打工仔;皆因此句之後,還有一句「千錯萬錯都係你錯」的潛台詞。Son姐更坦言,消費者由往昔至今從來未變,一直有如縱壞了的孩子,前線員工受氣似乎無可避免。

「以前試過有位城中富豪耍脾氣,一個煙灰缸就掉到(員工)血流披面,事後拎啲錢出嚟當湯藥費了事。以前有,今日都有(這些個案)。不同的是,今日發生呢啲事仲點隱瞞!早就俾人拍哂片放上網啦!喂,前線員工唔係奴隸呀,不應該對這些事情啞忍下去,你有權拎住證據去平機會告個客。」

「最唔應該做的,是當眾同個客爭執。你討厭個客有情緒好正常,但對住一頭野獸時,難道你要變成另一頭野獸去對抗嗎?」

看到這裏,是否仍難消你心頭之恨?

會否想過裸辭一走了之,卻又恐怕身負「逃兵」罪名,後患無窮?下一篇《忍無可忍好想quit?給我3個「裸辭」的理由》或者幫到你!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。