【溫多哪手記】譚仔進軍零食市場？　推麻辣豬耳和土匪雞翼味薯片

最近遞交上市申請嘅譚仔又有新搞作，繼2019年譚仔及譚仔三哥聯乘日清湖池屋推出麻辣和煳辣味薯片之後，近排就將名物土匪雞翼同麻辣豬耳變為薯片，未知公司係咪有意進軍零食市場呢？

「譚仔麻辣豬耳味薯片」係以譚仔嘅麻辣豬耳為基礎，辣度係三小辣；「譚仔三哥土匪雞翼味薯片」食落又香又辣，有香濃黑芝麻香味和口感，好似食緊土匪雞翼咁。粉絲們今日開始響下午茶時段3點至6點分別幫趁譚仔及譚仔三哥堂食食滿100蚊，就可以換到「譚仔麻辣豬耳味薯片」和「譚仔三哥土匪雞翼味薯片」一包，數量有限，換完即止。

不過，其實7-ELEVEN便利店響4月9日已經率先出售呢兩款薯片，每包賣13蚊，如果堂食食唔夠100蚊既粉絲，都可以單買試下味！