《POKÉMON 名偵探皮卡丘》拆解真人比卡超電影四大迷思

撰文:
最後更新日期:

比卡超(皮卡丘)真人電影《POKÉMON 名偵探皮卡丘》首個Trailer正式見街,雖然「死侍」比卡超咁得意,但好多人睇完都出現黑人問號:到底電影版比卡超係唔係小智嗰隻?比卡超應該係毛茸茸定滑嘟嘟?點解比卡超識講人話?電影版比卡超會變雷超嗎?筆者嘗試為大家逐一解答。

迷思一:電影版比卡超係唔係小智隻比卡超?

可以好肯定答大家,電影版《POKÉMON 名偵探皮卡丘》比卡超當然唔係小智嗰隻,因為佢原型唔係來自我哋熟悉嘅動畫同遊戲《寵物小精靈》,而係喺3DS上推出嘅《名偵探比卡超 ~新搭檔誕生~》(名探偵ピカチュウ 〜新コンビ誕生〜)。佢係屬於《寵物小精靈》衍生作(即是外傳),2016年2月3日喺日本任天堂eShop發行嘅遊戲,由任天堂子公司Creatures開發,2018年3月推出實體版,加入更多章節同埋支援Amiibo,再剔走副題正名《名偵探比卡超》,成為比卡超第一款懸疑查案遊戲。可惜遊戲推出後成績唔理想,消量只有約400萬。

3DS上推出的《名偵探比卡超 ~新搭檔誕生~》(名探偵ピカチュウ 〜新コンビ誕生〜)銷量平平。

故事方面,遊戲開始講述一隻比同類孱弱嘅比卡超(呢個世界係有好多隻比卡超),但佢頭腦就異常發達,更自稱名偵探,有一日佢遇上玩家扮演嘅男主角提姆,因為提姆可以聽得明比卡超講嘢,所以就兩個人開始一齊合力查案,解決城市發生嘅一連串神秘事件。至於電影版搵嚟Deadpool男主角Ryan Renolds配音,其實都係嚟自遊戲,原來遊戲中嘅比卡超嘅配音都係大叔一名。因此大家覺得好似極樂老人雷凱欣變到老練咁聲唔開胃,其實係一早設定咗,目的係想製作反差萌,至於出嚟效果反差的確勁,但萌唔萌就見仁見智!

《POKÉMON 名偵探皮卡丘》電影設定係來自3DS外傳遊戲,同大家見慣嘅《寵物小精靈》唔同。

迷思二:到底係毛茸茸定滑嘟嘟?

我哋成日喺動畫同遊戲中見到嘅比卡超,除咗黃色感覺上仲係滑嘟嘟嘅,所以好多人睇完Trailer之後都問:「點解比卡超咁多毛?」咁到底比卡超係有毛定冇毛呢?各位觀眾,答案係有的!只要你係動畫粉絲,一定有發現比卡超有時特寫係會有一層短毛披喺身上,但凡佢驚驚、發嬲或者打冷顫時就會見到啲毛毛,當然要好留心先睇到。

電影版比卡超並無小智隻比卡超一樣強大同敏捷。

證實咗「比卡超是有毛的」之後,下一個問題來了:「如果比卡超係毛茸茸,咁放電咪會電到變攣毛?」答案係……冇答案。勉強解釋嘅話其實比卡超係靠面頰上兩個紅色圓形嚟發電,咁可能兩個「腮」位係無毛的……當然呢個只係一啲粉絲嘅推敲,並唔係官方答案,要知道真相都係要問返小智啦。

如果比卡超毛茸茸,咁放電咪會電到變攣毛?

迷思三:點解比卡超識講人話?

原本動畫中只有喵喵怪識講人話,點解宜家比卡超都識講?其實上文都講咗,正如大家睇Trailer嘅解說一樣,一般人係聽唔明比卡超講咩,得主角聽得明,喺其他人嘅耳中只會聽到平時我哋聽慣嘅「Pikachu~」發音。相信有好多人都知呢個發音係有出處,「Pika」係模擬電光火花嘅「噼啪」聲,「Chu」則係模擬松鼠嘅「啾啾」叫聲。

比卡超發出嘅「Pika~chu~」係有規律嘅,而唔同規律就有唔同意思。

雖然比卡超講嚟講去都係呢三個音,但其實就算我哋唔係電影主角一樣可以聽得明比卡超講咩,因為根據動畫聲優大谷育江女士講,其實佢發音係有規律嘅,而唔同規律就有唔同意思,例如成日同小智講嘅「Pika~chu~」就係「我叫比卡超~」、「Pikachu~Pi~」就係「捉到精靈喇~」、「Piiika~Chuuuuuuu~」就係「我準備好戰鬥喇~」。最後女生們最應該學嘅,就係講唔好:「PikakaPika~」。

雷超跟名偵探比卡超造型大不同。

迷思四:電影版比卡超會變雷超嗎?

雷超係比卡超嘅進化,擁有更深嘅毛色,尾巴變咗閃電形,儲電更多電力更強,遊戲中只要用「雷之石」就可以進化。有人睇完Trailer問電影版比卡超會唔會進化雷超?答案係唔會嘅!原因有二:第一係因為遊戲《寵物小精靈 日月》中才開始加入的比卡超進化型,主要用作戰鬥,而《名偵探比卡超》中比卡超主要負責查案,並唔係作戰,原著遊戲中都冇出現過雷超真身。更重要係雷超與比卡超造型不同,因此如果要喺電影中出現,任天堂很可能會要求片商再支付額外肖像費,徒添製作成本。因此電影版中出現雷超嘅機會率係零……肯定係,除非唔係。

電影版唔會有「雷之石」幫比卡超進化。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。