飯戲攻心2｜胡子彤魏浚笙拗手瓜兩秒定輸贏 鄧麗欣觀賽被迷倒
撰文：許育民
出版：更新：
電影《飯戲攻心2》成為今年賀歲片票房冠軍，日前導演陳詠燊在社交平台分享一條拍攝花絮，拍到戲中的胡子彤與魏浚笙（Jeffrey）在等埋位時，來一場男人之間力之較量︰拗手瓜，身為運動員的胡子彤一直被睇高一線，但賽果竟然出人意表。
影片一來，就見二人擺好姿勢準備開戰。（影片截圖）
結果兩秒之間，迅雷不及掩耳，Jeffrey將子彤完全KO，全場尖叫。（影片截圖）
光速之下，謝君豪都嚟唔切影相，只影得一張。（影片截圖）
從片中可見，兩位男士一埋位便擺pose影相，二人都滿有自信。然後一聲開始雙方立即發力，但勢估唔到，二人在沒有特別角力鬥爭之下，兩秒就得出賽果，係Jeffrey贏，仲要係兩秒！兩秒就KO對方。
敗方係會較多啲理由，胡子彤今次以衫阻為由，要求再戰。（影片截圖）
第二戰更加擺好甫士影晒相先作賽。（影片截圖）
或許一切來得太快，胡子彤都不敢相信眼前的一切，於是要求再戰一次，並表示剛才被衣服阻礙影響表現，要除衫再戰。當一切都合乎胡子彤要求下，雙方再上陣，結果！都係兩秒，Jeffrey在兩秒內便成功再次KO胡子彤。
結果都係兩秒被KＯ，心服口服過「太太口服液」。（影片截圖）
Jeffrey擺出滿意的笑容。（影片截圖）
胡子彤繼續辯稱不是自己問題，是對方太大的問題。（影片截圖）
賽後胡子彤接受訪問表示︰「唔係我問題，係佢問題，佢真係好大力。」而一直在旁觀戰的Stephy鄧麗欣就驚歎︰「細佬（戲中角色）好勁呀！冇諗過佢咁Man。」但隨後又立即單打一句︰「我知喇，佢四肢發達……（拍攝者提示︰頭腦……）Pure！」