呢一味菜，九唔搭八，但我相信，味道好夾。（三個傻佬學煮餸，第一味菜梗係出「馬」，有請第一「傻」馬傑偉。）

===睇到最尾有食譜===

我近年才入廚，完全沒有基本功，Jim話我煮嘢古古怪怪。佢同我碟菜改名：「詭異黑森林」！我煮之前，完全不覺古怪，又不覺得詭異，也不會把菜名起為黑森林。怎料，菜弄好了，拿出來見人，Jim & Jeffrey口形一致，齊聲大叫，「嘩！咩嚟架！成個生日蛋糕咁樣！」但奇怪的是，男人覺得騎呢，在場的太太們都好開心，仲話味道好正添！

好啦，等我介紹返！這碟餸的基本原型，係我在大家姐屋企吃過的一味木耳絲甘筍小菜，清甜又可口，咬落好爽口，睇落好開胃，黑色紅色好養眼。

此外，我經常煮的一味冷盤，係醉鮑魚，大連大鮑魚，洗乾淨，蒸熟，上海糟鹵加果皮浸過夜，切片就可作前菜，和味易整，我經常用來款客。

有一次請我的碩士班老同學來我家吃晚飯，臨急臨忙，冷盤多，但不夠熱葷，就把上述兩道菜合拼。木耳絲甘筍絲再加蟲草花，貪佢哋有黑色、紅色，又有橙色。用洋葱茸加麻油蠔油炒一炒，把鮑魚放在面層，蒸10分鐘即可上菜。那天我家買回來清甜士多啤梨，見鮑魚圓圓的，中間可放士多啤梨裝飾，砌吓砌吓，砌到好似個蛋糕咁，不中不西，上枱之時，老同學嘩一聲，唔知我搞乜。但我的直覺與味覺告訴我，味道一個 layer 一個 layer， OK㗎！而且有視覺效果，食客完全不知如何預期，冇咗 reference，單單憑感覺食入口，大家竟然讚不絕口。

我知，朋友厚道。味道不差都會 like。今次煮畀Jim & Jeffrey呢兩條友食，佢哋的評價先係中肯。

占少話頂我唔順，太怪雞！

Jeffrey話啲味道太複雜嘞。

萬想不到，反而太太們看見碟嘢色彩豐富，又有生果，又有健康嘅木耳甘筍，勁開心開胃喎！

三傻實驗簡譜：

1. 前一晚做好醉鮑魚： 大連大鮑魚，洗乾淨，蒸熟，倒入上海糟鹵、果皮浸過夜。2. 木耳絲 + 甘筍絲 + 蟲草花，加入洋葱茸、麻油、蠔油炒一炒3. 把鮑魚放在面層，蒸10分鐘4. 鋪上士多啤梨，即成。

貼士：

請大家去上海舖買糟鹵酒試試，好好用，有酒味，有鹹香味，乜都唔駛落，用嚟浸蝦浸雞浸鮑魚過夜，保證好味！

（本文純屬作者意見，不代表香港01立場。）