文：薑

新聞報導中，差不多每天都有關於自殺的事件，當中不乏精神病患及抑鬱症病患。到底他們為什麼突然尋死？會否因爲受到什麼刺激而引致反常行為？他們有否得到適切的治療？

作為一個曾經在醫管局轄下的診所接受精神科治療的過來人，自己得到的經驗非常之差，特別是第一次求診時，醫生的態度不但沒有幫助解決問題，反而令我感到更加困擾 ——

醫生：（態度敷衍）有咩幫到你呀？

我：（雖然轉介信內有說明，但我也逐一告訴他)

醫生：呢啲係心理學家做嗰喎。咁我有咩幫到你？

我：（再繼續講其他病癥，但他打斷我的說話）

醫生：呢啲係心理學家做嗰喎。你都未答我問題，我點樣可以幫到你？

我：醫生，我唔識分，咁請你用你嘅專業知識話俾我知你有咩幫到我

醫生：你睇咗十幾二十次心理學家呀？

我：4-5次

醫生：咁你覺得心理學家幫唔到你，你要求嚟睇我？

我：我無要求，係心理學家覺得我可能需要精神科藥物幫助，所以轉介我睇你

醫生：咁我開藥俾你食？會上癮嗰喎，食咩藥？

我：我唔會知自己係咪應該食藥，係醫生你要用專業知識去決定。至於食咩藥，我更加唔識答你。

醫生：抗抑鬱藥、安眠藥⋯? 你覺得有咩問題？

我：請醫生你睇番心理學家的轉介信

醫生：咁你睇咗心理學家幾多次？通常要睇十幾二十次，佢哋至轉介睇精神科，點解你睇咗4-5次佢就叫你嚟

我：咁請你問番心理學家。

常言道「醫者父母心」，可惜在該位醫生身上確實找不到丁點。往後的兩次覆診，他都只是問我要不要繼續食藥，我真的想問他為什麼不是由他決定病人是否需要繼續食藥呢？而在短短的幾分鐘時間內，他真的可以診斷我的狀況？以前從未遇過這麼樣的醫生，相信這次真是有點倒楣吧！

根據自己的個人經驗，不禁想像當一個有嚴重精神病或情緒病的人如果不幸遇到這樣的醫生，情況會是怎樣？

病人會否由於不擅於表達自己而失去應有的醫治機會，以使病情日趨嚴重？

病人會否受到醫生態度上的刺激繼而做出反常行為？

姑勿論怎樣也好，以防萬一，還是建議如果家中有人需要接受精神科治療的話，相信由親人陪診會比較安全些，以便能夠清楚與醫生溝通病況，從而得到適切的治療。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）