上次講飛機椅背篇文提到，你前面嗰幾寸位到底屬於邊個，其實有排拗。

今次又畀你諗下：在餐廳畀嘅「貼士」，其實係屬於邊個嘅呢？你私下醒一百蚊個侍應就當然佢自己袋。但如果簽卡Round up嘅，或找錢唔拎嘅銀仔，又點計？法律上，到底客人畀嘅貼士，係邊個嘅財產？老闆？嗰個侍應？定所有員工？

答案係：其實我都唔知，在香港好似間間餐廳不同。但在美國，奧巴馬年代就法例講明，貼士係「前線員工」嘅。而家特朗普就提出條新例：過到嘅話，貼士就係「餐廳嘅財產」。呢條新例已經引起好多討論。

多年前同侍應朋友傾開，我先發現，我應該係侍應嘅眼中釘，歷年應該食過唔少加料餐。我對貼士嘅認知就係簽卡round up咗佢，畀現水就找錢唔拎銀仔，而我唔知道有人畀一百幾十貼士。我同個世界有啲脫節，但我依然係諗：加咗一仲畀咁多貼士？

朋友話我知，加一係餐廳老闆袋咋，round up嘅當然都係落老細袋。唔止，其實好多時啲銀仔都係落成個貼士池，要同其他人分。「有時老細同廚房佬都分埋一份」。所以，朋友話畀貼士直接塞畀侍應就最好。亦即係我在《我們痛恨的是特權　還是特權不在自己手中》寫嘅，有人明明「冇位」都可以搵到位，有人有糖水送，有人有海景位坐，就靠平時畀貼士新年封利是。

而我始終唔明白：點解要畀貼士？ 加一我明白，鍾唔鍾意都好，明碼實價，你冇得唔畀。我冇聽過有人可以因為餐廳收加一報警。但貼士，從來都係自願，但有啲地方你唔畀又會遭人白眼甚至拎上網公審。咁呢種文化又點走出嚟架呢？

朋友話，貼士係答謝侍應服務你。問題係，首先，好多餐廳都唔係指定邊枱客邊個侍應，埋單時見嗰個都唔係之前服務嗰個，咁答乜謝？。第二，其實，個服務唔係包埋？「咩包埋」？你份糧包埋咯。我去銀行，唔會因為櫃枱姐姐好好笑容醒多二十蚊畀佢（事實亦唔容許）。我去買衫，唔會因為個店員意見好有用整一百蚊過佢嘛。咁點解侍應會例外？

我覺得酒店服務人員收貼士，都算合理啲。例如幫你抬行李，咁呢啲真係額外服務嘛，唔係老奉幫你。但，侍應有乜額外服務畀我？除非真係多碗糖水咁咯 （但碗糖水老細出成本，廚房煮，而錢係侍應袋，合唔合理，又另一回事）。

侍應朋友話，唔好咁啦，侍應人工低，靠呢樣東西幫補的。我又有啲唔係好理解 ──因為我好少聽其他行業可以咁講。侍應人工低唔低，見仁見智。但廚房佬都可以話自己人工低，洗碗阿姐都會話自己人工低的。樓下看更人工低，你有冇畀貼士佢？

貼士原意係個動力，等啲員工用心啲。但我始終諗唔明：即係冇貼士你就西口西面？你份糧包咗乜先？無數咁多研究亦證明，貼士呢味嘢，同咩「服務水平」冇乜關係，反而係靚仔靚女必定多貼士，後生又好過老嘢，白鬼又多過黑人。

最重要嘅：大胸女收得多過細胸嘅（是真的），化妝嘅又收得多過唔化妝嘅。而一般都係女侍應收得多過男嘅，原因？怕且有錢客想溝佢啩。當然去到呢啲位冇人出嚟講同工同酬男女平等。

香港嘅貼士文化，點樣走出嚟，我真係唔係好知。得意嘅係，中國都冇呢種文化。咁我明，你話HK is not China，我哋受英殖影響嘛──但英國一樣冇香港咁興畀貼士。其實全世界貼士文化最盛嘅，係美國。

去過日本嘅都知，日本人係唔收貼士嘅，分分鐘當你侮辱佢。咁日本餐廳酒店又點運作呢？人哋啲客就唔尊重侍應？又唔係。人哋啲侍應人工特高？又好似唔係。

同樣係畀錢侍應，在美國，唔畀就係侮辱。在日本呢？畀先係侮辱。點解日本咁特別？有人話日本人每個人都敬業，尊重自己份工──嗯，咁所以，香港侍應係有幾尊重自己份工？（不過，美國人又未必同意）

奧巴馬年代規定貼士屬於前線員工，一樣唔少人不滿。最出名嘅係Danny Meyer，此人集團有好多間餐廳，佢2015年直頭廢除呢樣嘢，唔使拗。點解？因為佢覺得，貼士係前線員工袋嘅話，對廚房同洗碗嘅唔公平。所以亦有啲餐廳就畀廚師都出嚟上菜，就有得分。

況且，朋友話侍應人工低要幫補。但數據唔講大話：Danny本書提到，同30年前比，侍應收嘅貼士升左3倍──但冇得收貼士嘅員工，人工升得20%。貼士其實「唔公平」，益咗靚女化妝同大胸嘅侍應，忽略背後默默付出嘅廚房同洗碗員工。

特朗普新例又如何？新例話貼士係餐廳財產──但冇理過老闆要點分。老闆可以平分畀侍應同廚房，亦可以自己袋晒，唔怪得侍應多數反對。而另一方面，其實即使在奧巴馬年代，都有人（違法地）拎走屬於侍應啲貼士。我嘅睇法？都係，唔好搞咁多嘢，讓市場判斷吧。真心覺得服務好嘅，自己私下打賞，斷估老闆唔會報ICAC──不過靚女大胸同事就難免比同事杯葛了（定一路都係咁？）。

至於其他貼士老闆同唔同侍應分？其實未必咁大分別。冇得分貼士侍應收入就大減？未必。好多人以為老闆一定萬惡，但現實係而家失業率咁低，大把地方請唔到人。老闆會計數，你都會。呢間冇貼士分嘅，你咪要佢畀高啲人工。你睇而家飲食業咁難請人，就知個老闆唔係好大話語權壓你價的。

（本文純屬作者意見，不代表香港01立場。）