足料龍蝦湯　孝敬吳博士及歐陽校長

今次三傻到會，帶齊「架生」，到歐陽校長 James 家，開大餐！

席上除了 James，還有吳俊雄博士，都即將退休了。

Jim 認識 James 及 Dr Ng 多年，他自言十分敬重他倆。退休，人生大事，Jim 用盡心思，要做好一道情濃意深的 lobster bisque，孝敬兩位前輩。

當天晚宴，七時入席，但 Jim 下午兩點，已經拖住大包小包到場。馬仔我自己及 Jeffrey 也要煮，但五點才出現。一入屋，已經嗅到飽滿的龍蝦味。原來 Jim 已經搞到身水身汗。看見他專注的眼神、靈巧的手勢、額角那豆大的汗滴，yes！沒錯！Jim 真係落足心機。

龍蝦湯，在餐廳吃，湯匙一舀，優劣立現。有時稀薄冇料到，有時調味料多於真材實料。而一道濃郁的 bisque，用料足，價錢貴至一、二百元一人份，唔出奇。看見阿Jim大堆頭，蝦蟹一大煲，熬湯 3 個鐘，隔渣之後再隔渣，而且是 10 人份量，在餐廳這一窩濃湯，一千蚊閒閒哋，錢不算了，心機功夫，呢一味，好矜貴。

上桌之時，Dr Ng 說，醫生勸他不要吃有殻海鮮，但眼見桌前那橙紅色的龍蝦湯，賣相、香味俱佳，於是破戒，細味品嚐整碗濃湯，吃後大呼正斗。而神奇的是，Jim 沒有落調味料，味道均來自蝦與蟹的鮮味。少爺 Jim，真材實料，冇花冇假！

   oo 龍蝦湯食譜 (10人份）oo  

基本材料：

龍蝦 8 隻起肉，龍蝦頭及殻留起蝦頭半斤什蟹數隻

做法：

先將所有蝦蟹殻，搞碎放入焗爐，以 170 度焗 20 分鐘。西芹 8 條、紅蘿蔔 4 條細：切粒爆香，加香葉 5 塊，落茄膏炒香，贊少許拔蘭地。龍蝦肉切成小塊，用牛油白酒煎熟備用。

加入 4L 水，放入已焗好的蝦蟹殻，和炒香的西芹、紅蘿蔔，用大火煮滾後，加入黑椒碎，細火煮 3 個鐘。做好的湯須隔渣 3 次，剩湯汁準備麺粉撈，煮杰湯汁用：開鑊放 30g 牛油，慢慢倒入 30g 麵粉攪勻，炒 10 分鐘。之後將湯汁慢慢一面注入鑊，一面搞勻，加入適量白酒及淡忌廉，放入蝦蟹肉便成。

小貼士：

可用鮮魚湯代替清水，味道更濃郁。湯完成後，可加上現成酥皮，再放入焗爐以 170 度焗 20 分，就成酥皮龍蝦湯。

（本文純屬作者意見，不代表香港01立場。）