【商台靈異事件】鄭裕玲頂帽離奇被攝上天花板 森美供出嫌疑犯
撰文：冼燕珊
出版：更新：
商台一向多「故仔」，近日再次發生離奇事件，就係有唔少員工放喺公司嘅帽第二朝都會被移去唔同嘅位置，據知林海峰同森美都有中過招，今次嘅受害者竟然輪到Do姐鄭裕玲，真係老虎頭上釘虱乸，非常大膽。
Do姐頂帽被人離奇攝在直播室入面嘅隔格頂同天花板之間。（影片截圖）
Do姐喺IG開直播，話返到公司，平日掛喺走廊嘅帽竟然唔見咗，後來先發現被人離奇攝在直播室入面嘅隔格頂同天花板之間，幫手搵帽嘅有麻利亞同陳柏宇。Do姐話呢啲事已經發生咗一排，「查唔到係邊個，聽講阿Jan(林海峰)就話成日朝早都見到啲帽成日周圍擺，森美嗰邊無人理，之後就到我哋。」
競猜誰是兇手。(影片截圖)
陳柏宇估可能係林海峰，麻利亞就推測有機會係夜更嘅同事，Do姐就估可能係阿占同Donald，不過麻利亞突破盲點話：「你覺得佢哋有咁高咩？」Do姐聞言話：「咁又係喎，幾個騎膊馬都上唔到去喎。」目測直播室個樓底都超過四、五米，就算阿占擔櫈都擺唔到上去，令呢件事更添幾分懸疑，究竟係邊個咁大整蠱呢？
究竟邊個咁大膽, Do姐都夠膽玩呢?(IG圖片)
同係商台DJ嘅森美接受《香港01》訪問，嘗試解釋呢個現象：「有時我哋放啲帽喺公司，啲清潔姐姐可能唔知就周圍擺啦。」記者補充Do姐頂帽直頭畀人放上天花板，唔似係清潔姐姐所為，森美聞言大笑話：「咁好肯定係頑皮嘅同事做㗎啦！如果嗰個人知道頂帽係Do姐嘅話，我擔保無人夠膽掂。」森美話二台嘅同事一向都好頑皮，而佢更係當中嘅表表者，佢自爆試過將小儀對鞋掛上燈位度，等佢永遠都拎唔到。不過森美話依家少咗返商台，應該少咗呢啲整蠱事件。講起邊個最大嫌疑，佢就話：「我懷疑係細So做嘅，呢啲整蠱人嘅事唔係我就係細So做㗎喇。」
森美笑言以前成日玩同事。(IG圖片)
依家矛頭直指細So。(IG圖片)
+4