發發快餐33年味道如一有原因？ 接棒第二代：代表一家及街坊故事
屹立屯門友愛邨33載「發發快餐」， 不僅為一間舊式快餐店，更代表了昔日珍貴的回憶。由於從領展手上購入17個商場的基滙資本早前表明，類似「發發」的地標性店舖必定可以「留低」，這一間小店一夜間驟成良心業主打造的「示範單位」。
「我所謂的Puppy love，都係全靠發發！」該店第二代接班人關先生12歲起，便在「發發」打滾，不單與街坊結下深厚情誼，每天營營役役，更將兩父子的感情連起。
關先生曾在店中邂逅情一個她，經歷過像霧又像花的愛情故事，「發發的食物同味道，33年來一模一樣，同時代表咗我一家及街坊[故事。」
匆匆數十載如白駒過隙，記者眼中所見，「發發」店內裝潢從未改動，店中招牌、牆上懸掛的舊式大餐牌，甚至送餐的托盤，仍舊是80年代的舊風味，「全部是古董！價錢已經變曬，餐牌已經無用，但扔咗，就唔係發發！」關先生細訴店中點點滴滴。
關生：街坊眼中的肥仔
關先生自12歲起，已在「發發」打滾，對他而言，餐廳是自己的遊樂場，每日沖茶遞水，亦樂此不疲，「以幫手為名，其實都係玩，沖吓奶茶咖啡，幾好玩！我中學時間，唔太鐘意與同學仔玩。」
快餐店講求速度，食客總是來去匆匆。不過，在舊日的時光，縱然是快餐店，人情味卻仍然不減，「好多街坊由細睇住我大，一見到我，就一定認得我，大家都叫我肥仔。」
初次動心 餐廳邂逅她
在餐廳打滾的日子，不單見證了關先生的成長，更為他帶來情竇初開的回憶。「有一個暑假，係發發遇見一個女仔……感覺佢同其他朋友不同，我哋無拖手，甚至唔可以話拍拖！就連我都唔清楚，究竟係咩關係。」
然而，暑期過後，她再無光顧「發發」，這段情也隨之逝去，但經歷卻刻骨銘心，「個陣時唔會攞電話，唔似宜家！但佢個名我仲記得好清楚，(記者追問名字？)不過唔話得俾你知。」
遷出街坊回來重拾兒時感覺
「發發快餐」主打排餐，醬汁的調味、做法更從未有變，「我爸爸最堅持的地方，就係唔可以改變做法，令味道有改變，因為客人會食得出！」他指出，現時茶餐廳的食物種類繁多，做法已跟往日截然不同。他直言：「好多人搬走咗，都會特登返黎，想食返細個嘅感覺！或許想再見30年前的伯伯，即是我爸爸。」
老父經營之道：小本生意要睇緊啲
「發發快餐」由關先生父親一力做起，雖然年屆八旬，但至今仍每天落鋪打點。不過，父親年事已高，兒子已成為第二代接班人，他憶述，爸爸從前每日工時達14小時，不敢怠慢，「爸爸常說，小本生意要睇緊啲！」
不過他坦言，這一間屋邨小店，令父子情從不間斷。「向外捱的話，每日十幾個鐘唔喺屋企，返回來又攰到唔想講嘢，但大家喺餐廳時間，仲多過屋企，可以日日見。」
