Mr. 超出四人上限夾唔成Band 布志綸轉做司機:馬死咪落地行

撰文:黃浩晉
出版:更新:

新冠肺炎疫情持續肆虐,各行各業都面臨重創,尤其娛樂表演行業更是手停口停,事關近4、5個月各大小演唱會相繼取消及延期,整個行業歌手、樂手、工程人員、宣傳人員等等幕前幕後都冇工開。布志綸日前在社交平台出post,寫上:「Call車見到我個名唔使問,OK?」表示自己準備轉行做司機,稍為八卦一點的讀者都會想到,他太太家境富裕,傳媒稱他為「十億駙馬」,為何都要為生計煩惱?他大方回答:「呢個問題我預咗有人問嘅,其實我都咁大個人,正如大家都一樣,有手有腳就希望用自己能力養活屋企人。就算我太太屋企有能力,唔代表我要攤大手板問人攞㗎。」

「有手有腳就用自己能力養活屋企人」

之前兩篇「疫市下的音樂圈實況」報道中,訪問過著名樂手Joey Tang,亦訪問過音響工程公司老闆,面對行業完全停擺他們異口同聲說:「都唔知捱到幾時……」身為幕前的Alan面對同樣困境,只是他太太家境的關係令人覺得他「唔使捱」,但實況非然。Alan坦言:「呢個問題我預咗,我亦唔需要好激動去回答,我已經咁大個人,正如大家都一樣,當你冇錢嘅時候都唔會想問阿爸阿媽攞,有手有腳嘅就用自己能力去養活自己同屋企人。就算我太太屋企有能力,唔代表我要攤大手板問人攞㗎,呢個係我由頭到尾嘅生活態度。」

Alan不想做一個純發夢的人,在Mr.休團期間他一路有發表個人作品,去年Mr.亦有舉行十周年演唱會,面對關於他太太家境的問題,他反問一句:「唔通咁就可以懶懶閒咩都唔使做咩?同埋我覺得問呢個問題嘅朋友,其實香港人好唔鍾意俾人標籤,但係又好鍾意標籤人,我諗呢個問題大家要反思下。」

由疫情開始,音樂業手停口停,布志綸近日雖然推出新作品《喘一口氣》,但這段期間要有商演機會仍是近乎沒可能。 (葉志明攝)

做過侍應、裝修就算做司機都冇所謂:馬死咪落地行囉 

Alan早前在社交網站出post表示自己準備轉行做司機,他坦言這段時間從事音樂行業非常艱難,他亦在尋覓收入來源,反正自己也是有車,「馬死落地行」做司機也沒有所謂。他說:「之前喺IG都分享過,我餐廳侍應、裝修又做過,喺唱片公司做過,唱片鋪打雜都做過,我成日覺得馬死落地行㗎啫,咁自己有手有腳,做得幾多咪盡做囉冇乜所謂㗎。」至於會否仿佛Carpool Karaoke唱下歌,他笑言:「咁應該點樣向你收費好呢?哈哈!」他續說:「如果喺疫情入面,能力範圍做到嘅,都想可以為大家帶嚟快樂嘅感覺,喺呢個感覺絕望嘅情況下帶啲希望俾人。」

出道前曾任職侍應、裝修、唱片鋪打雜等行業,布志綸至今相信,馬死落地行,只要肯做仍可能養活家庭。 (葉志明攝)
+1