林峯今日（6/2）現身尖沙咀出席《金龍獻瑞醒獅賀歲》活動。提到古天樂為造就他攞今屆影帝，只角逐最佳男配角。林峯接受《香港01》訪問時表示：「我好多謝老闆對我一路嘅照顧，其實都認識咗佢十幾年，而咁多年嚟佢除咗係我老闆之外，佢亦係我嘅大哥哥，有好多嘢佢都會教我，變咗我都好希望可以喺電影上面繼續努力，唔好辜負佢。」

被問到「讓路」舉動有否造成壓力？林峯坦言：「其實我都做咗20幾年演員，係你接到劇本嘅時候，同埋拍攝時嗰一刻角色反而係好大壓力，因為你要滿足到導演嘅要求，呢個先係壓力。而我哋台前幕後都付出咗好多努力，後面就要全靠觀眾嘅支持。（自己有冇信心？）當然希望可以入到圍，因為我真係未試過參加「香港電影金像獎」，如果真係入到圍，對我嚟講係一個非常大嘅認同。加上如果可以同一班嘅前輩角逐獎項，對我嚟講都係一種榮幸。」