《開心速遞》雖然被稱為師奶劇，但每逢有Terry（李偉健）或KC (歐瑞偉）出現，必成為網民追睇的劇集，昨晚(23日)那集又到Terry表演，完美演繹一個發明星夢的二世祖，戇居的表情深得網民歡心，更封他為御用on居仔、世界級on居仔（居字當然修飾咗，因為粗口唔出得街），看Terry的演出，或許覺得他演技生硬，講對白像背書，但就是這種「不合格」的演技，卻令人看得開心，Terry接受《香港01》訪問表示，原來他一直都想演得自然，可惜自己資質差，估不到反而錯有錯著......

「我本身性格都有啲木獨，戇居，不過應該冇劇入面嘅Terry咁誇張啩，哈哈，Terry呢個角色原本喺《愛‧回家》閒角㗎咋，做做下就越嚟越多，呢個角色應該係我唯一代表作，都唔會有人揾我做其他角色㗎喇，試過心灰意冷，唔係因為冇得做大明星、冇得上位，我知自己事，而係自己做戲真係太屎喇，完全冇進步咁，做極都係咁差，好唔自然，拍完第一輯《愛‧回家》，佢哋叫我返去第二輯我都有疑問，係咪真係返去呢？做到差成咁，好彩係KC 瑞偉哥鼓勵我，佢話戲就一定越做越進步嘅，其實我已經好俾心機做，應該真係天份問題，但我發覺越想演得自然，出嚟就更加唔自然，越認真做，觀眾就越覺得好笑。」

誤打誤撞正好影容他的演藝生涯，亦因為這種不自然的演技，令他成為新笑匠，網友更稱他為世界級on居仔，Terry亦不介意，他說：「咁冇得介意㗎，我都想人哋叫我叻仔，但我個樣真係唔夠醒，笑我都唔緊要，起麻都係一種支持，好過鬧我啦，係咪？我哋呢行係帶俾人娛樂，觀眾見到我開心，我都開心，其實我一入行已經同朋友講我想做諧星，但我想攪笑就冇人笑，反而我認真做，啲人先覺得好笑。」

相比起演技，Terry對自己的畫功更有信心，未入行前他是畫漫畫的，在無綫期間亦要教小朋友畫畫幫補生計，他說：「我想放棄呢行好多次，諗過唔做呢行，因為真係演得好差，諗過教畫畫就算，不過到《愛‧回家》繼續揾我，前輩同我講，公司揾得你，証明你都少少作用，好彩佢哋鼓勵我，我先留低咋，因為我做戲資質太差。」而Terry除了感謝網民錯愛外，亦特別答謝劇中拍檔ＫＣ歐瑞偉，他說：「瑞偉哥係一個好好嘅前輩，佢會特登捉我早返一兩個鐘，同我一齊對戲，研究下點做。」所以大家睇到Terry和KC咁攪笑，其實他們下過不少苦功。