陸浩明否認《食好D 食平D》無贊助導致延期:係多到要慢慢揀

撰文:張嘉敏
出版:更新:

由Maria Cordero (肥媽) 同陸浩明 (六號) 一齊主持的無綫飲食節目長做長有,全新一輯名為《食好D 食平D》的節目將於5月播出,到時大家又可以睇肥媽教煮餸喇。不過有傳聞指原本呢個節目是安排在4月播出,要延期至5月先出街是因為遲遲都找不到贊助商。身為該節目的主持之一,又係肥媽契仔的六號出席TVB Big Big Channel活動記者會時,被問到有關傳聞即否認說:「梗係唔係啦,傳聞錯咗呀!」六號直指傳聞根本是調轉來寫,他說:「我哋個節目係TVB呢年最多贊助商嘅節目嚟,直情係多到要慢慢揀,有各種唔同嘅贊助商,例具廚具、電器、食油等等,肥媽自己都代言好多品牌會有贊助。」
 

陸浩明話傳聞調轉嚟寫。(陳順禎攝)

他解釋節目要延期是因為要配合Big Big Channel新推出的Big Big Shop:「我哋一早拍好晒,要配合Big Big Shop先至特登延後播出。個傳聞完全係調轉嚟寫,肥媽係代言女王嚟,又點會無贊助。」他又謂同肥媽拍節目效率好高,最快試過於節目出街前3個星期完成拍攝:「最高記錄1日拍4集,即係我一日食20個餸。」提到他同肥媽打算放甚麼上Big Big Shop賣,他即笑言:「肥媽咁多樓,我想叫佢擺啲物業上去賣。(叫佢送層樓畀你結婚啦?)你幫我叫吖,我淨係爭層樓咋,阿媽話做人要靠自己努力,所以我都要靠自己。」

六號笑言叫肥媽賣樓。(陳順禎攝)
六號話肥媽唔會肯送樓畀佢。(陳順禎攝)