李司棋迎中秋靠月餅重拾童真　用盒砌城堡賣萌：無聊事認真做！

仲有三個星期左右，又嚟到一年一度嘅中秋節！而中秋節嘅主角，當然就係月餅啦。早幾日李司棋就收到月餅贊助，廠家亦都非常之有心思，將司棋姐個靚樣印咗落個月餅盒上面。藝人一般收到贊助嘅時候，總會同啲產品自拍開心Share吓呀，司棋姐都唔例外！

不過佢就唔似一般藝人嘅做法，司棋姐竟然將嗰幾十盒月餅當積本咁砌，後尾仲砌到成個城堡咁，自己仲坐埋落去，分享嘅時候仲留言話：「無聊事認真做。」司棋姐用月餅砌基地呢個行為雖然真係有啲無聊，但佢𠱁得班粉絲都不知幾咁高興，佢哋仲大讚司棋姐勁可愛𠻹！