梁靖琪陀B不忘為拯救柬埔寨雛妓籌款:帶BB做多啲慈善工作 

撰文:朱奕錦
出版:更新:

梁靖琪(Toby)與老公施雋賢(Jon)、鍾麗淇(Margaret)、吳佩慈及蔣怡等人日前於中環出席香港女律師協會「同一月亮慈善晚會」,為國際慈善團體 AIM(Agape International Missions)籌款,拯救一班柬埔寨雛妓。

剛宣布懷孕的Toby身穿紅色晚裝及三吋高踭鞋赴宴,老公Jon與好姊妹Margaret全程化身「左右護法」傍實,陀B後首次出席公開活動的 Toby 表示:「AIM對我嚟講係好重要嘅慈善機構,係老公介紹AIM畀我識,今次創辦人仲特登嚟咗香港,我覺得好有意義。加上今次係女律師協會搞嘅慈善晚宴,由一班女仔凝聚一齊去做一件事更加別具意義,希望可以籌多啲錢幫到更多小朋友。」她又指自己即將榮升媽媽,所以特別關注小朋友的教育:「知道AIM有創辦專門嘅學校為有需要嘅小朋友提供免費教育,依家有超過500名學生,希望各位善長慷慨解囊。」

當晚每籌得8000港元便可以為當地兒童在 AIM 創辦的學校提供一年教育;每籌得40000港元便可提供足夠資源給 AIM 拯救隊伍,解救至少5名雛妓脫離苦海。創辦人Don Brewster與Bridget Brewster表示曾與香港的善長人翁會面,親自詳解了AIM的實際救援工作,亦非常感激他們的踴躍捐輸。

(左起)Jon、Toby、AIM負責人Matthew、AIM負責人Melissa、AIM創辦人 Bridget、AIM 創辦人Don。

Toby透露健康狀態十分好,所以身體力行支持慈善,為BB進行胎教:「依家習慣每個星期同老公去教會,每晚都會祈禱,希望BB聽多啲我哋講嘢,帶佢做多啲慈善工作。今年因為要留喺香港安胎,去唔到柬埔寨做探訪,不過已報咗名下年再去,唔知到時會唔會帶埋小朋友去做義工呢?」問到老公可有對她穿高踭鞋有微言?Toby 笑言:「我老公好煩,由我開始話要着高踭鞋之後,佢就上網係咁睇孕婦幾時唔着得高踭鞋,係咁叫我買過對鞋,所以今晚我行去邊,佢應該會跟我去邊,哈哈。」

(左起)女律師協會副主席Sarah、珠寶商人Christine、Toby、女律師協會主席Benita。

至於同樣為慈善出心出力的Margaret,自稱客串做Toby的「一晚助手」:「有得做慈善,食飯之餘,又可以做Toby助手,托一托佢隻手,等佢行得輕鬆啲。」已是兩女之母的她表示已與 Toby 交流湊B心得:「我同佢講湊仔永遠都係一個謎,每個小朋友都唔同,不過Toby好多湊仔經驗,我兩個女係佢契女,湯盈盈嗰兩個都係佢契女,加上有咁多朋友喺身邊照顧佢,應該冇問題啦!」

Margaret笑言Toby湊仔經驗豐富。