《全民造星II》決賽前夕 強尼公開冠軍心水:佢第一次唱已經好好

撰文:游大東
出版:更新:

由ViuTV製作的重量級綜藝節目《全民造星II》,總決賽將於本周日(15/12)晚上在將軍澳邵氏影城舉行,由於全民投票排名佔總分的一半,所以「終極十強」:Phoebus(吳啟洋)、Oscar Li(李祉均)、Mike(曾比特)、MC(張天賦)、Tank(梁德忠)、JJ(范卓言)、Brian(阮頌揚)、George(歐鎮灝)、Hugo(丘凱雄)、Justin(陳樂)近日積極向觀眾及粉絲拉票。

《01最賞睇娛樂大獎》即日起至12月24日接受投票喇,仲可以參加勁抽雙重獎,隨時贏旗艦手機11 Pro Max、Dyson風筒、01積分等,總值超過70萬元!

「冠軍呀?好難講!因為大家都好平均,即係佢哋各自有好嘅野,亦各自有唔好嘅野,老實講,我身為主持人,而家都唔知決賽個賽制係點樣。」強尼說。(葉志明攝)

強尼作為《造星II》的唯一主持人,過去半年親眼見證96位參賽者不斷累積演出經驗,於舞台上逐漸成長,所以他的冠軍預測絕對有份量;奇怪是,強尼從未透露看好哪一位學員能夠奪冠,直至日前接受訪問時,他終於向記者公開自己答案。「如果講唱歌,因為MC自己彈自己唱,我覺得佢幾穩陣,但我最鍾意就係Hugo,淨係第一次開口唱我已經覺得:『嘩!好好!』佢真係能力好,有自己風格,辨識度高,香港需要有個咁嘅歌手,我好想聽佢唱下一隻歌!」若果說整體表現能力平均,強尼則對Phoebus和JJ有信心。

個人心水歸個人心水,當晚能否勝出,還看臨場發揮,而《造星II》的「終極十強」,泰半是唱得之人,強尼承認今屆決賽有別去年,擂台上,將會上演一場「唱將大戰」。「我普遍覺得今年(參賽者)唱得咗,比如舊年咪Ian囉,你一諗就會起佢,今年你會覺得,真係幾個都唱得,就係Justin、MC、Hugo同Mike,容易(獲取高分)啲囉我覺得。」他的意思是,今屆晉身決賽的學員中,沒有人能夠像去年Lokman或者肥仔那般,能夠有信心在舞台上駕馭跳唱,同時具備個人風格,「喺一個咁大嘅舞台,有一樣嘢做到出嚟,能夠去到某個水平,你諗下,一個人有埋Dancers,要跳唱,你好難會覺得:『嘩,郭富城喎!』起碼呢10個人入面,有邊幾個唱得,能夠一出嚟就Stand Out(出眾),我覺得會着數啲。」

若果說整體表現能力平均,強尼則對Phoebus和JJ有信心,尤其是前者。「其實Phoebus都幾全面,而且我覺得佢係有後勁,佢係整個節目五分之四嘅時間係迷失,其實大部份人都會,一玩Group就會迷失,但喺最後嗰兩Round,佢開始搵返自己!」(葉志明攝)

為《造星II》作「賽後檢討」

《全民造星II》從製作到播出歷時大半年,如今來到尾聲,也是適當時候作「賽後檢討」。節目播出後,不少觀眾都將這一屆和去年的第一輯《造星》比較,直言今年悶過舊年,強尼坦言,《造星II》是否真的悶到瞓着,還看觀眾心態。「睇你想睇咩囉,呢40幾集你係想睇咩先?想睇好精彩嘅歌舞?好明顯第二季(學員)已經比第一季平均能力高咗,呢個係肯定。」

強尼承認,如果觀眾的着眼點,是學員在舞台演出以外的真情流露,今屆難免會失望,「我覺得今年係少啲嘅!」但他指,節目組有這個製作傾向亦無可厚非,「第一季冇人知出嚟件事會係點,只係見到班後生仔勇往直前喺度衝,直至做完出到嚟(節目出街),原來咁做會瀨嘢嘅,會『死』㗎喎,(今屆)有人咪會選擇唔做呢啲嘢囉,所以咪會少咗嗰啲元素囉,但我覺得好正常,任何呢種節目,一季季咁樣落去,Even係《America's Next Top Model》(全美超級模特兒新秀大賽),第一季第二季第三季一路變,因為製作人已經知道內容會點發生,就會想喺嗰個範圍去搵一個位對自己有利,大家都可能會偏向做緊同一類型嘅事去取悅觀眾,我同意(《造星II》有這個效果),亦都好正常。」

點擊下列圖片,欣賞《全民造星II》終極十強圖輯:

+26

回應造馬指控 強尼:拍18個鐘都播晒出街咩?

觀眾對《造星II》的另一指控,是賽制不公,最經典一幕,是Rain P(方震揚)於第二輪淘汰賽,原本沒被三位導師取錄,最終火火因為聽完強尼對Rain P綵排表現的評語後決定挑選他入組,而有網民戲言這是「全民造馬」。對於這種負評,強尼沒有上心,他借節目製作的過程,詳細解釋。「第一Round,我哋拍咗18個鐘,剪晒出街咩?你知我哋講過啲乜嘢咩?Airtime所限,唔會全部播出街,只係剪啲Bite出嚟,變咗得返兩三個評判講,有啲評判講嘅嘢就唔會落。」

同樣地,每個參賽者在強尼眼中,與出局的距離甚近 ── 只得分半鐘,他不想一個大好青年,為追尋理想鑄鐯滿志,卻因為臨場失準而離開。「我都唔想一個年青人,唔知佢準備咗幾耐,咪畀多啲機會佢講多啲佢想講嘅嘢,或者聽到評判講一啲對佢有益嘅嘢,或者你見佢已經震晒,眼淚都就標出嚟,你都想撩下佢㗎:點解咁呀?係咪好失望?錄影嘅好處就係剪,我哋盡量去做到呢啲嘢出嚟,錄影嗰陣,我唔知同事會揀咩素材去出,我只係平常心,每一個人(參賽者)我都係咁做。」製作團隊怎樣處理錄影的片段,他沒權過問,他只能夠盡力做好主持的本分,「剪到出嚟,我又唔覺得需要幫我自己講係咪公平,唔緊要嘅,你哋覺得咪得囉。」

提到在《造星II》幫Rain P「推銷」,成功將他送入火火帶領的Team A,強尼說只是做好自己本分,亦不覺得是現場氣氛 ─ Rain P是ViuTV前員工,據聞錄影時全場起哄 ─ 令他有這個決定:「我唔覺,因為其實我係一個節目入面比較忙碌嘅人,分半鐘(演出),Tag完,分半鐘,我坐喺度望住個Monitor,睇下評判咩反應,我係冇機會同其他人講嘢,跟住已經要諗出去嘅時候要點樣講嘢,其實嗰分半鐘係諗緊我嚟緊呢個Tag係要點做,成件事係點做,佢哋(工作人員)係點,我完全唔會知。」(《全民造星II》截圖)
重提在《造星II》幫Rain P「推銷」一事,強尼續指,錄影的時間相當緊迫,從來沒有人走出來說要偏幫哪一位,「可能咁啱Rain P佢之前喺ViuTV做,如果我幫『波仔』(Boris)講咗幾句(讚美)說話,唔會有人覺得有啲咩咁特別㗎,可能就係因為佢係Rain P呱?!去到《Real Talk》,Rain P唱得好好,Cotton都好好,觀眾咪自己判斷囉。」(葉志明攝)

【全民造星II】「十大最不受歡迎參賽者」   強尼幫口反而累事?

【全民造星II】主持強尼明幫自己人勁不公?  網民批:全民造馬!

【全民造星ll】強尼單飛主持   不怕香港局勢影響收視:人總會好奇