鄭秀文大讚Marf有型　直言新人訓練好準備充足：令我好感動

鄭秀文（Sammi）今日（8日）出席Miu Miu Women's Tales「女人的故事」放映活動，以一身白色閃鑽套裝亮相，配上bling bling髮箍，青春有活力。Sammi透露，現在媽咪是首位，所以甚至推了些工作陪伴：「雖然覺得都有啲可惜嘅，但諗落個大前提，即係每一年呢啲能夠同媽咪慶祝嘅時間會好珍惜。」

之前Sammi看完電影《梅艷芳》在IG大讚王丹妮做戲好，今次兩人同場出席活動，她再次表示很欣賞對方的表演：「我覺得咁有心拍咗呢部戲去紀念梅姐，所以都恭喜佢成績咁好，同埋都做得好好。」除了王丹妮，古天樂的演出也很令Sammi驚喜：「佢假髮好正，我覺得佢都好用心去做，睇得到成個幕後團隊都真係好用個心去做呢件事，所以我覺得作為觀眾都好有福，可以睇到咁嘅電影。」

臨近年尾，樂壇有很多頒獎典禮，Sammi 8月推出新專輯《Listen to mi》銷量不錯，但她笑言沒有留意自己的歌：「我有留意下而家市面上個情況，其實我真係覺得而家嘅新人實力好犀利，唱得好好，加上跳，各有特色，同埋啲音樂個類型都多咗好多，同我哋以前相比，可能而家突然一下好多新人，咁變作有好多唔同嘅歌種，聽返好多廣東歌真係好正。」不過Sammi稱自己不會專登focus唱跳，主要是聽首歌有無感染力，慢歌會不會感動：「但其實每個禮拜都好多新嘅廣東歌，反而係好開心呢一樣嘢。」

對於鍾意的樂壇新人，Sammi認為好多都好好：「我覺得基本上每個人都各有特色，只不過你能唔能夠將你個特色可以發揮得最好。同埋其實樂壇係一條好長嘅跑道，頒獎典禮只不過係其中一個好小嘅站，係自己事業裡面好小嘅一個站口，所以唔得獎嘅話一啲都唔使灰心，同埋好多都咁後生，來日漫漫一定好多機會。」

今日《全民造星4》的冠軍熱門選手施彥筒（Marf）也有亮相活動，Sammi大讚其「好有型喎！」她續指道：「我覺得而家新人一出嚟都好professional到直情好似一個專業嘅歌手，咁所以對比返以前我初出道真係戇居居咁樣，真係好驚慌，上到台隻眼都唔知望邊度，即係而家係好唔同，佢哋好似一個新人，但其實個training好好，佢哋自己袋住咗好多嘢先上呢個舞台，我覺得呢個令到我感動，即係做咗功課，好有preparation，所以上台就可以有一份真係超自然嘅嗰種自信，就唔似我哋嗰陣時要浸好多年先開始隻眼有啲自信。」