在銅鑼灣開業多年的「丹麥餅店」，以炸雞髀、豬扒包等食物聞名。日前，有網民在facebook群組上載豬扒包照片，大呻裏面的豬扒是「豬肉紙」，咬開炸皮後只有一塊薄薄的豬扒。照片引來熱議，有人就笑言「刀功都值啦」，「一塊薄過火腿嘅豬扒，你估度度有得食㗎？」不過，就有人提到該店的豬扒包在銅鑼灣地段只賣18元，「人工、舖租、燈油火蠟唔使錢咩？」丹麥餅店回應《香港01》記者稱，未遇過顧客投訴豬扒太薄，反而是有人投訴不夠熟，所以才將豬扒打薄更易熟。

下載「香港01」App ，即睇城中熱話：https://hk01.app.link/l7U1Y7t5LO

丹麥餅店有逾40年歷史，雖名為餅店，但他們最有名的是炸雞髀、熱狗和漢堡包等懷舊港式食品，除了港人，也有不少遊客前住光顧。不過，有網民昨日（6日）在facebook群組「PLAY HARD玩硬」發文，質疑該店的豬扒包偷工減料。從照片所見，豬扒看起來比外面的麵包更大，難以完全蓋着，但咬一口後發現炸皮裏面只得一塊薄薄的豬扒。

樓主甚至形容店舖「豬肉紙飽充豬扒包」，「雖然我讀得書少，你都唔好呃Ｘ我 ，其實E（而）家香港地仲有無老實商家 」。

看過樓主的照片後，有人笑言那塊豬扒是「薄炸」、「薄切黑豚肉」，又有許多留言讚切豬扒的人「好刀工」，「你係食刀功呀，你估食個包咩」。但有網民指在銅鑼灣花18元買豬扒包不能期望太多，「$18蚊係咁上下㗎喇 !」不過，有留言就反駁，指重點不是食到薄豬扒，而是「裝假狗扮厚」。

《香港01》記者就豬扒問題向丹麥餅店查詢，店方稱未收到關於豬扒太薄的投訴，反而是有客人投訴豬扒不夠熟，所以廚師才將豬扒盡量打薄，令豬扒落炸爐後更易熟，「師傅話容易熟呀，所以打薄啲，冇乜問題呀，驚唔熟呀，有啲人投訴話唔熟，咪打薄啲」，但亦承認有時會打得太薄。至於是否因為原料價格上升而令豬扒愈來愈薄，店方就予以否認，說「無變過」。