「阿妹，要啲咩？細佬，腩汁定咖喱汁？」好姨響亮的聲音，今午過後，便會成為大埔街坊的回憶。17年前，廖先生與太太及妹妹「好姨」，選中了這個位於運頭街的橫街窄巷，一個毫不起眼的舖位，展開他們的小食店家族生意。眼前這些魚蛋燒賣、碗仔翅、撈麵撈米線，養大了他們幾個子女，也養大了區內幾代學生，有舊生聞好運店結業在即，即使烈日當空下排隊45分鐘，也要尋回當年那親切的味道。

好運店售賣的，不過是尋常小吃，被問及鎮店之寶，店主廖先生笑言要數蒜蓉撈麵，「為咗迎合學生哥口味，蒜蓉撈麵係區內首創，佢哋想要咩都盡量滿足」。回想當年，大哥廖生與太太及排行第五的妹妹「好姨」開設好運店，四家姐及六妹相繼加入幫忙，好運一直長伴他們至今。17年來，在300呎的空間，滿佈油煙與汗水，兄妹每天由早上6時工作至傍晚，毫無怨言，動力來自一班年幼子女，如今子女長大成人，勸他們退休，「以前無錢，日做夜做，現在夠使，應該陪多啲仔女」。

廖先生坦言退休計劃考慮了3年，「最近個孫出世，6月初先決定真正退落嚟，細仔幫我開咗個facebook（專頁），講話唔做，好多街坊聽到特登返嚟幫襯」。下午3時許，隊尾已排到北京桌球城門口，食客即使大汗淋漓，也堅持要在這幾天回味那親切的味道，廖生指沒想過結業消息傳出後，每日都大排長龍，「呢幾日都做到無停手，好多謝街坊捧場咗咁多年」。

「有幾個學生唔想返學，走嚟叫廖生扮爸爸，打去學校請假！幾曳！」

首創蒜蓉撈麵　好姨細數學生百厭史

好姨的笑容，是好運店的生招牌，左一句「阿妹」，右一句「細佬」，親切的態度令人賓至如歸，而好姨另一個殺手鐧，便是她驚人的記憶力，她能喊出每位熟客的名字，即使是事隔多年才回來的舊生，好姨仍能細數當年點滴，「試過有個學生，會考考到30分，返嚟話我知，好叻仔！」即使是搗蛋的少年，在好姨眼中也是本質不壞的好學生，「佢哋活潑啫，試過問佢哋今日做乜咁晏先嚟食嘢呀？佢哋都會老實答我畀Miss罰留堂，我記得班男仔讀恩主教㗎！哈哈！」

好運店附近中學林立，幾乎每個聖公會莫壽增會督中學、恩主教書院及王肇枝中學的學生，都曾幫襯過好運店，好姨更細數3間中學的「特色」，「王肇枝出好多社工，莫壽增出好多醫生，恩主教就……都幾靚仔靚女！哈哈」。好姨收舖在即，大爆當年已結束的瑪利亞書院學生秘密，「有幾個學生唔想返學，走嚟叫廖生扮爸爸，打去學校請假！幾曳！」記者問，最終廖生有沒有幫他們打電話，好姨笑着說：「一次半次就幫佢啦！」短短數句，滿載溫馨，學生放入口中，除了是可口小食，還有那份買不到的溫情，難怪能俘虜區內幾代學生的心。

廖先生終日在廚房內汗流浹背煮汁，笑言多得妹妹，好運店才生意興隆，「我幾個妹好識做公關，十幾年嚟氹得啲客好開心」。門外掛有幾張橫額，印有廖家兄妹的照片，還有無數食客簽名祝福。

食客：得返啲菜我都要

長長的人龍中，不乏3間中學的舊生，好運店對他們來說，是滿載青蔥歲月的地方，15元的魚蛋麵，多年來力抗通脹，成為區內窮人恩物。楊先生是莫壽增舊生，昨午特意回來買撈麵吃，「以前lunch成日嚟食，估唔到會唔做」。Florence是恩主教舊生，足足排了45分鐘才買到撈烏冬，「都知會好多人嚟排隊，但都想返嚟食，出面冇見過有撈烏冬賣」。熟客溫先生更指好運店是他的飯堂，「早餐晏晝都會嚟食，夜晚阿媽唔煮飯又會嚟食，係第二個家」。

門外幾張圓枱，坐滿了公公婆婆、家傭、小孩、情侶與學生，個個吃得津津有味，未到5時，店內大部分食物已售罄，即使好姨大喊：「燒賣冇喇，撈麵賣晒喇。」仍趕不走店外的街坊，有男街坊回應：「得返啲菜我都要。」也有人見食物櫃全空，在雪櫃拿走一支烏龍茶後，再向好姨說：「我聽朝跑步再嚟搵你。」好姨指，這幾天的食物都是酌量收費，「賣晒就冇架喇」。

廖生和好姨坦言，今日過後，不用再早起開舖，定會不慣，「好唔捨得啲街坊，學生個個都大晒，對面老人院啲老友記走吓又一個，都走咗好多個」。話雖如此，二人退休後各有各忙，廖生先去遊埠，好姨則專心湊孫，「第時都會揸車過嚟大埔買餸，希望同街坊後會有期」。

煎釀三寶、雞髀、牛腩、撈麵和碗仔翅，在運頭街角落裏，從此成為集體回憶。

臨別依依，廖氏姊妹笑說，「圍裙就換過幾條，招牌就一直冇換過」。