【金庸逝世】才子亦是營商天才？億萬富豪自少已有搵錢天份！

2018年10月30日，一代文壇泰斗金庸逝世，享年94歲。
雖然如此年紀已經可謂福壽全歸，但呢單大新聞依然令全球華人惋惜，尤其係萬千個睇金庸小說大的讀者。
然而，在大家緬懷金庸妙筆生花同埋回顧佢一生同時，卻容易Missed out了金庸另一個非常引人入勝的一面：金庸係文人史上絕無僅有的「搵錢天才」，自小已經極有做生意天份，亦憑此天份，後來一躍成為億萬富豪。

1. 金庸15歲創業，寫考試Tip題天書：第一桶金

金庸15歲時的商業天份已經嶄露頭角，當時依然在浙江讀中學時，睇到好多中學入學考試有個Pattern，而且可以用一種有效方式準備。因此，金庸同幾個同齡朋友就將自己考入學試的經驗同見解寫成一本書《給初中投考者》，而且自組出版社。

無錯，就好似而家香港的補習名師出的天書。

結果，一出呢本書，一紙風行成個浙江，甚至到鄰近的江西福建等地。單靠呢本書收益，三位作者都賺到一筆可觀收入，足以完全支付一直到大學畢業的學費。

英雄出少年，唔一定係武俠，亦可能係一位商業奇才。

2. 明報創立之初苦戰：靠寫小說撐起銷量

靠連載在商報的《射雕英雄傳》賺取了一點名氣與本錢，金庸意識到始終係出報紙先好賺，寫小說雖然有趣卻難以過安穩生活（起碼係當年而言，如今的報業夕陽可謂恍如隔世），因此創辦《明報》。

然而，如意算盤一開始打唔響，做報紙比想像中困難，人有我有的新聞報導同社評，銷量總係難以做起。

結果，金庸依然用自己一個大優勢，就係識寫好睇的小說，並在明報連載起來。好多Fans就係為左睇金庸連載小說，而追買明報。就係咁，撐起份明報。而明報，亦為佢帶來極豐厚利潤。

3. 明報上軌道　匯聚眾人之力　賺大錢

寫小說，寫到識飛，都係你一個人的產能。然而，辦報紙，卻係整家報館上下，從記者到編輯，以及專欄作家，齊齊匯聚文字力量，吸引大批付費讀者，而報紙可以從中賺取利潤。

當然，金庸固然對寫作有濃厚興趣，亦包括寫社評。金庸以本名寫社評，亦係極精警，而且不怕得罪權貴，敢講真話。

即便如此，金庸產能依然係眾人之最，日頭寫社評，點評國際局勢，夜晚就寫小說，筆下江湖恩怨，兒女情長。做一個Knowledge based企業的一流Leader，Lead by example的典範，莫過如此。

因此，金庸唔只係股東，老闆；亦係Chief Writer 總筆。Chief就係首領的意思，尤其係呢個人人自稱CEO的年代，能夠親自上陣的Chief，實在難得。

4. 金庸呢個腦細　頗為算到盡

明報出名人工低，尤其係對專欄作家，稿費總係低迷，跑輸其他同業。雖然有點衰，但商業世界確實如此，睇雙方的Bargaining power，金庸只係做返佢做老闆的責任而已。例如，當明報已經打出名堂，銷量口碑都係頂尖，咁你身為作家，就希望泊住呢個大招牌，為自己創造名氣，而且在明報有自己專欄係一種Validation，所以平啲你都肯寫。

在商言商而已。

當然，到後來蘋果日報輝煌年代，報紙要靠高薪搶人，一個普通編輯閒閒地5-7萬一個月，明報流失幾多人才，以及幾多Market Share及銷量，則是後話了。

金庸管理哲學：管錢 + 管人

金庸認為，管理一家企業，首重管錢，其次管人。無論幾有理想的企業，都離不開一條簡單公式：收入>支出 = 利潤

因此，正如以上所講，金庸嚴控開支，包括稿費。衛斯理作者倪匡的妹妹亦舒，亦係著名作家，就曾經多次同金庸投訴明報唔加稿費，結果在自己的明報專欄鬧金庸孤寒，金庸依然不為所動。當然，後來金庸亦私底下拆掂左，但由此可見金庸管錢之嚴。

管人方面，對於報社呢類知識型企業尤其重要。

當一間公司的產能完全建基於一個一個有高度技術的人才（記者，編輯，作者），而非好似一間工廠靠機器同勞工來生產，管人的願景同制度尤其重要。

對於人才，金庸主要講感情，一靠哄，二靠供養，好似古代春秋時代供養食客的地方諸侯。金庸尊重旗下人才創作，鼓勵大家講真話而no bullshit，拒絕一切大公司式官僚作風，因此令明報行動極具效率。

SJ結語

睇金庸如此一個劃時代人物：橫看成嶺側成峰，遠近高低各不同。文人金庸同商人金庸，同樣引人入勝。尤其後者角色，大家一直忽略，卻係至為關鍵。

感謝您，金庸，祝您在一個更好的地方偶爾回望凡間，繼續笑傲江湖。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】