【溫多娜手記】Visa港澳一姐撑場學生問答比賽 唔教碌卡大談理財

撰文:溫多娜
出版:更新:

講起Visa,難免聯想起「碌卡消費」。不過早前Visa港澳一姐史美琪(Maaike Steinebach)就親身去中學生「全港通識理財問答比賽」撑場,除咗教路大家要「管好盤數」,仲提醒中學生要小心數據私隱!

籲留神個人私隱保障

原來全港通識理財問答比賽至今連續5年舉辦,一直都由Visa全力支持,到總決賽階段更有Visa香港及澳門區董事總經理史美琪現身打氣。呢位Visa港澳一姐致辭時提醒,現今數據訊息量龐大,但私隱保障仍有不足,呼籲大家做好個人財務管理之餘,亦都要顧及個人資料私隱保障,尤其當電子錢包及網上金融服務選擇愈來愈多,就更要保持警覺!

根據Visa資料,今年「全港通識理財問答比賽」特意加入FinTech、個人私隱及網上支付等內容,畀學生學習點樣善用新科技理財。今年比賽破紀錄獲10,450人次參與,累計5屆數字,全港已有六成中學、逾4.5萬人次參與理財挑戰。比賽最終由最終風采中學獲得全場總冠軍,亞軍及季軍分別係天主教伍華中學及明愛屯門馬登基金中學。