【勁歌總選】頒獎禮似搞笑多過嘉許　網民：簡直侮辱咗李克勤

昨夜《2017年度星夢…勁歌金曲頒獎典禮》完結，頒獎禮共頒發三十八個獎項，而TVB旗下廠牌「星夢娛樂」共得到15個獎項成為大贏家。不過全晚節目少少都無頒獎禮嘅感覺，反而似乎年尾惡搞大會，大家等睇藝人們的尷尬情節。三個主持也不用多說，中間加插嗰段抖肩舞Rap都唔知咩人諗出嚟，要三位娛樂大眾都算，仲夾硬喺無知會台下歌手嘅情況底下，拖埋佢哋落水。歌手是歌手，不是Rapper，唔係行埋去佢就識得Freestyle，最終幾位歌手都不知所措，而坤哥更是懶理環節，堅持唔Rap，場面尷尬直迫「關家姐攞獎」。

不過唔緊要頭半段都仲可以當綜藝節目睇，起碼都叫有啲Noise，好過某啲頒獎禮頒完獎就落台。而一個頒獎禮，識睇一定係睇最後幾個大獎，雖然心水清嘅樂迷應該都估到最後幾個大獎會頒比克勤，不過勢估唔到喺佢發表感言嘅時候，由於時間逼切而被工作人員「圈」佢快啲，而克勤也帶點無奈道：「你圈我咁我講快少少啦。」睇慣頒獎禮便知道，歌手在台上被圈，除了是因為趕時間，更是可能仲有幾個獎要一次過頒發，為免之後無嘢講，克勤亦相當識趣快快講完。

怎料頒發壓軸大獎「最受歡迎歌星獎」時，這個一向沒分十強八強的獎項，卻突然把五強選手叫上台，分別為李克勤、胡鴻鈞、周柏豪、菊梓喬、鄭俊弘。明眼人都睇到，五強佔了四個星夢歌手，安排他們在克勤身邊可說是奇怪不過。其實四人出道年資加埋都唔夠克勤三十年咁多，大家真係會覺得好緊張，而歌手又真係會覺得有得鬥？說穿了，其實也只是安排四位星夢歌手上台陪襯，順道向大家宣布這四位歌手是TVB力捧對象，要不然在這樣趕時間的情況下，為什麼不直接宣布克勤領獎，讓他獨自享受個人舞台？

而克勤發表最後一段感言後，似乎再度被「圈」，搞到相當無引：「撩啦撩啦，你over你就cut我隻歌啦！」主持人6號只好打圓場：「唔會呀，唱到過咗晚間新聞都無問題。」唱完《C3PO》及《失魂記》後，主持人之一的麥明詩連byebye也未及講完便立刻被cut，給觀眾一種滾水淥腳的感覺。不少網民看完最後一Part，也不禁為克勤抱不平：「擺四個年資爭咁遠嘅後輩上台一齊爭獎，仲要狂圈克勤，對佢簡直係一種侮辱！」