BigBigChannel直播數據藝員自費 譚偉權:玩幾分鐘就幾百MB

撰文:林通賢
出版:更新:
Big Big Channel上星期五面世,不少TVB藝人都用自己數據支持公司。(資料圖片)

無綫落重本的Big Big Channel上周五(23日)正式上架,進軍網絡世界,過百藝人都撐場,就連在橫店開工拍《深宮計》的視后胡定欣,首日都要開live響應。藝人不單止出力,更加出錢,因為所有手機做live的數據都是藝人自費,公司沒有津貼,所以除非本身手機plan是無限數據,否則電話費都幾昂貴,玩1分鐘live大約用13MB。觀乎這星期,每位藝人大約每玩live都5至10分鐘一條,有些更去到15至20分鐘,如果不是無限數據,電話費都幾甘。

(左圖)譚偉權剪頭髮都玩緊Big Big Channel,仲玩成9分鐘,唔怪得爆數據啦。(右圖)如果想支持藝人,可以購買代幣,最貴1848蚊,最平8蚊,豐儉由人。(網上截圖)

有些藝員就特別支持Big Big Channel,好像唱《12隻恐龍去野餐》的譚偉權,就密密玩,更玩到爆了數據,他說:「我玩頭幾日已經爆咗喇,嘩!原來玩幾分鐘就幾百MB,真係估唔到,原來食MB幾快,我唔係無限Plan㗎,電話費未知幾多錢,張單未嚟,但而家都會繼續玩,不過會玩啲有wifi嘅地方囉,(公司有無津貼㗎?)我諗冇啩……而家等到月頭有返數據再玩過囉。(網友想你唱《12隻恐龍去野餐》)係咩?咁我唱下囉,哈哈,不過我7月2日有個騷喎,我都會唱㗎。」

其實做人最緊要開心,能夠同fans互動又支持到公司,是值得的,而且有說無綫鼓勵旗下藝人玩,因為是有分紅的,好像台灣《17直播》有些網紅主持,每小時可賺10萬台幣。不過TVB........譚偉權就表示聽過同事話有,但詳情亦不太清楚,據知無綫藝員的經理人為撐Big Big Channel,都分別廣發WhatsApp叫藝人玩,但就沒有講明可以分幾多錢,當然藝人亦沒有太市儈和公司計較,大家講心嘅……

岑麗香玩live當然多人睇,不過幕後都玩的話,真係唔知有幾多人睇喇。

為了Big Big Channel,無綫傾盡洪荒之力,據知綜藝組全部監製都要度節目配合,有些幕後更親身上陣,簡直令台前幕後上下一心,更鼓勵藝人開緊廠錄影或者拍外景時都玩下,不過就暫時未拿捏到底線,因為不少藝員想正式埋位前專心投入角色,揸住個電話玩live,導演見到實鬧死啦。