近排有傳媒指出，無綫新晉小鮮肉余德丞(Dickson)原來屋企相當有米，家住跑馬地2000呎豪宅，仲有幾個單位收租，而且又靚仔又高大，係正宗的「高富帥」。今次憑住《誇世代》正式入屋的Dickson，短短時間人氣已經相當之高，仲同麥明詩和近期的劉穎鏇傳過緋聞。

究竟Dickson點睇自己係咪「高富帥」呢？在接受《香港01》訪問時，他坦言出面的報道不盡不失，他說：「我諗啲報道都誇張咗，因為無可能有2000呎咁大，我諗一半就差唔多，同埋都係屋企人嘅物業，唔係我嘅。至於經濟壓力，我無問屋企人拎錢，用自己份糧俾少少家用，之後自己維持日常開支。我就一定唔係高富帥，我都未到6呎，得180cm，TVB都大把人高過我。靚仔更加稱唔上，公司咁多靚仔小生，所以啲標題真係誇張咗。我鍾意我另一半係運動型啲，同埋鍾意食嘢，短頭髮都ok。」

咦，又要運動型，又係要大胃，劉穎鏇真係好符合喎！會否有機會繼續發展？Dickson就話：「佢緊係運動型喇，佢打籃球咁勁，仲勁過我，我都唔識打。我諗係因為拍嘢嘅關係，因為之前一齊去台灣，一齊去食嘢，所以先有呢啲緋聞。好似之前同麥明詩因為《誇世代》傳出緋聞，其實無乜特別，大家都係正常朋友，呢個時候都係事業為重。」又啱嘅，而家先28歲的他實在不用著急去拍拖談情，拍多啲好劇俾觀眾睇先喇！