【專訪】徐榮24歲失業後入行　曾因冇工開亂諗：我係咪得罪邊個？

徐榮在07年憑無綫處境喜劇《同事三分親》裘俊一角成功入屋，當年人氣急升，事業闖高峰，更榮獲提名「萬千星輝頒獎典禮2007」最佳男主角，往後兩年也獲提名，可惜最後五強止步，獎項最後都擦身而過。隨後緊接有代表作《愛‧回家》系列。06年與現任太太結婚，婚後徐榮育有一子一女，身兼多個「角色」，除了當家中的好丈夫，好爸爸外，還有一個稱號是「演戲大師」，皆因徐榮在與朋友合資創立的兒童教育中心，擔任演藝視覺導師，憑多年累積的演戲經驗，啟發小朋友的潛能認識自我，帶動創新思維，創造無限可能，相比起做演員來得逍遙自在。

哥哥追問「時間表」　朋友嘲諷發明星夢

時為1998年，當年只有24歲，因工作的公司倒閉，感到前路茫茫，正值大台藝員訓練班招生，便「膽粗粗」參加第13期無綫電視藝員訓練班，畢業後隨即加入無綫成為合約藝人，一做便20年。

徐榮坦言，父母從來都是自己的最強後盾，讓他發夢：「爸爸媽媽好支持我，一路都冇問我有咩角色做，去到咩位置。」反而哥哥和身邊朋友不太理解，希望他能提出「時間表」。「哥哥有問過我會擺幾多時間落去呢一行，朋友都有話我，但又好難怪佢哋嘅，佢哋覺得我無端端走去做演員，好多人直覺話：『你唔好玩啦，發咩明星夢呀，做人不如實際啲啦，你都試咗幾年，係時候諗清楚點行條路。』」

自己條命自己揀，徐榮深明此理，所以朋友開口批評後，他不會反擊，始終行動最實際。「佢哋打擊唔到我，只會令我更堅強，做我哋呢行真係好衰，當你覺得冇發揮嘅時候，佢又整一個有發揮嘅角色俾你，又會令你重燃希望，自覺又好似成功喎，跟住又沉寂一排，當你想唔做，佢又俾個角色你。」開工收工，日出日落，春去秋來，就這樣徐榮於無綫工作20年，由寂寂無名，變成家傳戶曉。

跑龍套辛酸　導演請做賊遭武師撻落地

離開藝訓班的課室，好聽一點，就叫新晉演員，難聽一點，就叫「新仔」，「新」「辛」同音，注定要走一段艱辛的路。徐榮回想，當年仍是「新仔」時，導演要求做什麼都要做，就算粉身碎骨都要演下去，只希望能有下一次工作機會。

有一次，最難忘。「入行兩三年嘅時候，有個副導演搵我話：『徐榮有個角色好啱你做嘅。』咁我話做咩㗎？副導話：『做賊呀。』心諗做賊都好呀，都幾有發揮喎。」做甚麼？多對白嗎？正常人也會如此計算，得到的答案是：「對白就冇嘅，但動作唔少！」他初時有點猶豫。「咁我咪問佢動作唔少，係咪應該搵武術組呀？但佢就叫我返公司先，到時同武師一齊傾吓。」

開工那天，武指跟他說：「佢話一陣會搵個武師，我係一個賊嚟嘅，要搶武師嘢，佢還擊將你打橫一拋，拋你上幅牆度，打橫然後再撻落地。」徐榮嚇呆了，以為「點錯相」，「我即場問係咪角色上調轉咗？武師話：『唔係，撻落嚟嗰吓有戲嘅，要有反應嘅，所以要你做。』」如此他在毫無準備之下，拍了10幾個Take，「成個人硬食落牆度，條腰都散晒，痛咗好多日。」

願可回頭不當演員　冇工開時胡思亂想

大台人工偏低，相信大家都有聽過，有些藝人生活捉襟見肘，最終決定離巢，但仍有人堅持留守到最後一刻，繼續追尋演藝夢。徐榮直言：「其實多數時間比較辛苦，真係唔好講，真係唔好揀入呢一行，唔好做戲，因為好多嘢預計唔到，即係你做一份文職嘅工作，雖然你預計唔到會有咩職位，但起碼都會預計到每個月有幾多人工呀，之前都試過冇工開嘅日子，自己會好多嘢諗，會反問自己：『係咪我做錯乜嘢，係咪我得罪咗邊個呀？』但而家唔會有呢種諗法，好彩近呢幾年都有Keep住有工開，不過都試過一兩個月時間都比較得閒，又唔可以話冇工開嘅，可能啲角色唔連戲啫，如果冇工開咪湊下仔女或者打理下自己啲生意。」

教育制度窒礙發展　辦學釋放小朋友潛力

開辦教育中心是徐榮多年心願，眼見兒子的足球隊友，因本地傳統高壓教育制度下紛紛離隊。有見及此今年2月斥資6位數字，在沙田石門開辦兒童教育中心，期望以輕鬆教學方式啓發小朋友創新思維。

「傳統教育埋沒咗好多有天份嘅小朋友，天份唔一定係學術上面嘅嘢，佢哋對於藝術、創作、體育可能有好好嘅潛能，因為香港教育制度實在太忙太大壓力，所以唔可以喺嗰幾方面發展得到，其實我都睇唔少。」他說自己的兒子有份踢波，在足球隊中，見到有些小朋友踢波明明好有潛質，但因為讀書，而要放棄發展，「練練吓波，又冇嚟到，就係功課做唔晒，又要考試，所以嚟唔到練波，就係咁浪費咗有天才嘅小朋友，所以我開辦呢間教育中心，就係要佢哋天馬行空去創作，發揮自己小宇宙。」